الثورة وجيلنا !!!

يمكن دي اول مرة اتكلم في حاجة تمت للسياسة بصلة
وأنا عامة مش هتكلم في السياسة
أنا هتكلم بس عن الفجوة بين جيلنا والأجيال اللي قبلنا
جيلنا اللي كل الأجيال الأكبر منا شايفة انه جيل تافه وما يعرفش حاجة ولا يعتد رأيه في أي شئ
حتى في مناقشاتي مع بابا لمست الحكاية دي .. بيسمعني .. وبيسمع رأيي وبيعلق عليه كمان
بس الكلمة اللي لازم تنتهي بيها المناقشة هي .. أصل انتوا صغيرين .. أصل انتوا ما تعرفوش
النهاردة في حلقة العاشرة مساء منى الشاذلي كانت مستضيفة شابين من المدونين
شباب من عمرنا وآراؤهم قريبة إلى حد ما من آراءنا
ومعاهم الشاعر القدير سيد حجاب
كانت عاملة بينهم مناظرة عن رأي كل واحد فيهم في ثورة يوليو
ونتائجها
مبدئيا أنا لمست في الطرفين خوف من ذكر الحقيقة اللي كانت ممكن لو اتقالت تقرب وجهات النظر شوية
الحقيقة إنه الفساد اللي احنا عايشين فيها هو نتيجة حكومة ... نتيجة حاجات كان صعب تتقال في التلفزيون
مع إنها اتقالت بس كتلميحات
اللي الناس دي مش قادرة تفهمه
هو إننا متفهمين سبب حبهم لثورة يوليو
ومدركين كويس الثورة دي عملت ايه لمصر
بس زي ما قلت .. ( متفهمين) بس مش ( حاسين ) لأننا ببساطة ما لمسناش التغيير دة
هما لمسوا الفرق لأنهم عاشوا الفترتين قبل وبعد الثورة
أو على الأقل اتربوا على إن الثورة دي أجمل حاجة في مصر
لكن احنا اتولدنا واتربينا في جو تاني
ما كانش قدامنا وضعين نقارن فيهم .. احنا في نفس الوضع من يوم ما اتولدنا
ما ينفعش إننا نعزل نفسنا عن الواقع عشان نقدر نفهم ثورة يوليو
إيه اللي وصلنا من ثورة يوليو
في ال 55 سنة اللي عدت علىثورة يوليو .. لحد ما عدت السنين دي كلها .. كانت آثار ومبادئ الثورة دي
اختفت وتلاشت ومابقاش ليها أثر تقريبا
فلو كان وضعنا الحالي دة هو نتاج الثورة وأنا لا أعتقد ذلك فالثورة كانت لعنة علينا
الوضع الحالي نتج عن إيه ؟
دة السؤال اللي بنسأله
هل الوضع اللي جيلنا عايش فيه هو امتداد للثورة ؟
يعني لو ماكانتش الثورة حصلت كان الوضع اختلف ؟
هل كان الوضع هيبقى أسوء ولا أحسن ؟
اللي أهالينا والأجيال اللي قبلينا بيحاولوا يوصلوهولنا هو إن الثورة كانت الحل الوحيد الذي لا بديل عنه
الثورة فعلا عملت حاجات كويسة زي مجانية التعليم والمصانع الحربية وغيره وغيره
بس في نفس الوقت الثورة لم تحول مصر من مملكة إلى جمهورية زي ما بيقولوا
لأنه مصر عمر ما كان فيها انتخابات
وعمر ما كان الشعب فيها بيختار الرئيس
لا قبل الثورة ولا بعدها
يعني الثورة لما حطت عبد الناصر رئيس محدش اختاره
الشعب لم يكن له يد في الموضوع من قريب أو بعيد
بغض النظر عن إن الشعب كان عاجبه عبد الناصر
بس اللي حصل انه بعد كدة خلاص محدش بقى يختار ودة ناتج عن إن الثورة ما خليتش حد يختار
يبقى مصر ما تحولتش جمهورية نهائي
والنظام ظل ملكي
جيل الثورة بقى مش قادرين يسمعوا منا الكلام دة ومش قادرين يفهموا ازاي احنا بننتقد الثورة
وبيعتبروا ان دة بسبب اننا ما عشناش الثورة ولا قبل الثورة فما ينفعش نتكلم
شاب من الشباب اللي في الحلقة
قال كلمة حلوة اوي في الآخر
وهي محور كلامي
إن الجيل بتاعنا بقى عنده عزوف عن الكلام مع الناس الكبار في السن
وإنه الأجيال الأكبر منا مش عارفين عنا ولا عن تفكيرنا حاجة
وبالتالي أصبحنا في نظرهم الجيل الهايف التافه اللي لا يفقه أي شئ في أي حتة
ليه يا ترى مش بنحب نتكلم مع الأجيال الأكبر منا ؟
ببساطة لأنهم فعلا مش فاهمين احنا بنفكر ازاي
ومش قادرين يصدقوا إن جيلنا بيعاني برضه
وانه اتولد في عصر زي الزفت
مش عشان مصر حرة ومافيهاش احتلال واحنا ما شفناش جنود الانجليز والفرنسيين يبقى معنى كدة ان كله تمام
لأ في حاجات كتييييير تانية بتخللي الشعب مقهور
في إن الشباب دة كاتم جواه كتير
والهيافة والتفاهة اللي هما شايفينها في الشباب دي مجرد غطا .. ستارة بيحطها الشباب على نفسهم عشان يهربوا بيها من الواقع
مش معنى كدة ان كل الشباب التافهين في الأصل بيفهموا
بس شريحة كبيرة منهم
وأنا جربت أتكلم مع ناس كدة
تظهر قدامك قمة في التفاهة والهيافة
لكن لما دخلت معاهم في مناقشات وحوارات عن حال البلد أو عن حال الشباب أو عن أي حاجة
لقيت ليهم آراء وآراء قوية أوي كمان
دلوقتي هل في حل للفجوة اللي حاصلة بين جيلنا وبين الأجيال اللي قبله ؟
أنا فعلا بعرف أتناقش مع اللي أكبر مني
وبيسمعوني وجايز كمان بيعجبهم رأيي أحيانا
بس لازم في الآخر ينتهي الحوار بكلمة انتي صغيرة
انتوا جيل جديد ما يعرفش حاجة
الحوار في البرنامج انتهى بقصيدة ألقاها الشاعر سيد حجاب
قصيدة فعلا معبرة أوي وماكانش عليها اختلاف
بتتكلم عن حال مصر اللي حاليا مفيش فيه اختلاف بين كبير أو صغير
ويمكن دي نقطة الالتقاء الوحيدة اللي حصلت طوال الماقشة على مدار ساعتين ونص
ودي القصيدة:
سلوا قلبى وقولوا لى جوابا * لماذا حالنا اضحى هبابا
لقد زاد الفساد وساد فينا * فلم ينفع بوليس او نيابه
وشاع الجهل حتى ان بعضا * من العلماء لم يفتح كتابا
وكنا خير خلق الله صرنا * فى ذيل القايمة وف غاية الخيابا
قفلنا الباب احبطنا الشبابا * فادمن او تطرف او تغابى
ارى احلامنا طارت سرابا * ارى جناتنا اضحت خرابا
وصرنا نعبد الدولار حتى * تقول له انت ماما وانت بابا
وملياراتنا هربت سويسرا * ونشحت م الخواجات الديابه
ونهدى مصر حبا بالاغانى * فتملؤنا اغانينا اغترابا
وسيما الهلس تشبعنا عذابا * وتشبعنا جرائدنا اكتئابا
زمان يطحن الناس الغلابة * ويحيا اللص محترما مهابا
فكن لصا اذن او عش حمارا * وكل مشا اذن او كل كبابا
ودس ع الناس اوتنداس حتى * تصير لنعل جزمتهم ترابا
امير الشعر عفوا واعتذارا * لشعرك فيه اجريت انقلابا
وما نيل المطالب بالطيابه * دى مش دنيا يا شوقى بيه دى غاب