Wednesday, November 21, 2007

كــلام م الــقــلــب

اضغط على الصورة للتكبير
نظرا لأنه طبعا زي ما اتفقنا أنا واحدة مشغولة جدا
فأنا عملت تصميم تاني عشان الأولاني مش عاجبني
:D
جميع الحقوق محفوظة
يعني أنا اللي عملاه :D



دة نوع من الفضا .. من كتر المذاكرة اللي عندي سيبتها وكتبت الخاطرة دي
والأهم من كدة التصميم ..ز أنا اللي عملاه
مبسوطة أنا أوي اني سايبة المذاكرة وقاعدة بعمل في تصميمات وأكتبلها خواطر
:D

حروف تتلم
وتتجمع وتتشبك
عشان تنسج
كلام م القلب
يقيد شمعة
ويزرعها ما بين كل حرف حرف
كلام عنك
كلام عني
كلام عنا
كلام عن فرحة تجمعنا



حروف اسمك
حروف اسمي
وكل حرف فيه يحكي
عن الجنة
واحلامك واحلامي ... وأحلامنا
ورسمة قلب
على شجرة .. وفيه السهم
وفراشة حب
وريحة الورد



صور قدمت
صور لينا
وصور ليا
صور بحر كنا بنرمي فيه همومنا
وعلى شطّه كتبنا الحب بحروفنا
وبالرملة بنينا بيت يجمعّنا
صور لينا ولاصحابنا
لاغلى الناس وأحبابنا



وكلام م القلب
كلام عن أحلى أيامنا
وفي الأخر لقيت صورة
وأنا لوحدي
حزينة كتير ومكسورة
ورسمة قلب
على شجرة ومفيش السهم
ولا حرفي ولا حرفك
خلاص ماتت فراشة الحب



وصورتي قاعدة بستنى
رجوعك ليا بتمنى
تاخدني تاني للجنة
ومن حبك تسمعني
كلام م القلب

Wednesday, October 24, 2007

....بــــخـــاف


وهي الفرحة جياني
بخاف الضحكة تملاني
وأعيش فيها
وأروح بيها لكون تاني
وألاقي الدنيا تضحكلي
وتفتح بابها علشاني
وألاقيها تكلمني
تقوللي أنسى أحزاني



***



بخاف تحلو أيامي
و ألقى الجنة قدامي
بخاف أفتح في يوم عيني
ألاقي مركبة فرحي
تناديني
بحور حزني تعديني
ولما الموج ساعات يعلى
ألاقيها تغطيني
وبشراعها بتحميني
بخاف بين ثانية والتانية
لألاقيها بترفعني
وفجأة لحزني ترميني
وموج الهم يسحبني
في بحر الجرح ألاقيني



***



بخاف الفرحة تغمرني
وأعيش في الحلم
فأنسى كل حزن وهم
وجوا قصوري ألاقيني
بخاف من فرحة الدنيا
لا من حلمي تصحيني
وألقى جراحي تناديني
ومن تاني
ألاقي الفرحة نسياني
وألاقي الدنيا قافلة الباب
في سجن الهم حبساني
وأنادي لمركبة فرحي
ألاقي الموجة سحباني
ومركب فرحي سايباني



***



أغمض عيني
أدور عالضحكة في أحلامي
ألاقي جراحي وأحزاني
بخاف من الفرحة تخدعني
وتسرق مني أيامي
وتديني أمل فيها
وتاخد مني أحلامي



***



بخاف من البسمة تقلب جرح
فأكره دنيتي والفرح
وأكره كل أيامي
وأخاف الفرحة تملاني
وأعيش فيها
وأروح بيها لكون تاني

Saturday, October 20, 2007

جربت تبقى businessman قبل كدة ؟؟




عمرك جربت تبقى مشغول اوي
؟؟؟
تليفونات ليل ونهار
عندك دفتر مواعيد
اوقاتك كلها مشغولة
تدخل النت تلاقي ناس كتير اوي اون لاين بكلموك
علطول دماغك مشغولة بتفكر وبتبدع
:) :)

الاحساس ده مش لازم يرتبط بشغل ما بعد التخرج !!
الاحساس ده انت ممكن تحسه بنشاطات وجروبات تدخلها وتشارك فيها
ليه مخلي حياتك فاضية ؟؟

ليه مش بتساهم وبتشارك في حاجات تفيد مجتمعك
انت فين من الجروبات الخيرية ؟؟
انت فين من المشاريع التنموية ؟؟
مش بتشارك في الجروبات العلمية في كليتك ليه
؟؟


احساس تاني وشعور مختلف
تحس انك بتعمل حاجة لدينك
لاسلامك
لوطنك
لبلدك


الفترة اللي فاتت اتعرفت على كذا شخصية رائعة بجد
منهم شاب حدد لنفسه هدفا ان يصبح صلاح الدين الايوبي الجديد
وضع الهدف واشتغل عليه

ومنهم شاب زميل لي في الكلية اشترك الصيف ده في نشاطات رائعة علمية وترفيهية
ومنهم فتاة جعلت من حماية مستقبل الناس رؤيتها المستقبلية
بجد لما كلمتهم حسيت ان الحياة عندهم مختلفة
منهم اللي قالي انا كنت بقضي الاجازة اعد على القهوة
لحد لما صاحبه قاله عن جروب جاي البلد بدي كورسات تنمية وكدة
اشترك وتفاعل وشارك لحد لما خد وضع كويس وبقى منهم


رمضان ده الواحد حس باحساس مختلف
حس انه بيعمل حاجة سواء من شنط رمضان
او من اعمال خيرية تانية
حس انه شخص مفيد
انه لما يموت فيه ناس حتفتكره
فيه ناس حتدعي له


حتى في المسجد اللي كنت بصلي فيه
ال organizers
عملوا شغل جامد اوي
حسيتهم وهبوا وقتهم للمصلين
بجد ربنا يكرمهم


في كل حتة فيه ناس
وهبوا جزء من وقتهم لنشاطات
تنفع الاسلام
او تنفع المجتمع


انت لسة لحد دلوقتي مكتفي بدراستك ؟
انت لسة لحد دلوقتي مش عارف هدفك؟
انت لسة لحد دلوقتي وقتك فاضي ؟


ابتدي اشترك في نشاطات ابتدي دور على نفسك
ابتدي اعمل حاجة الناس تفتكرك فيها
ابتدي اعمل حاج تقولها لربنا لما يسألك عملت ايه للاسلام ؟


بجد احساس تاني لما تبقى
business man
وقتك مليان للاسلام والمجتمع والناس
:) :)



لو حد عمل حاجة او اشترك في حاجة ممكن يقولنا ويفيدنا بتجربته وانا ممكن انشرها في الموضوع الرئيسي
يارب انفع بنا الاسلام والمسلمين..



Friday, September 14, 2007

رمضان كريم وهدية رمضان اهي :)






السلام عليكم ورحمة الله وبركاته

مش حنطول في الكلام قمنا ويسبر وانا بفضل الله تعالى

بعمل برنامج متواضع مع جدول رمضاني مبسط

لشهر رمضان المبارك



نسيبكم مع الملف وكل عام وانتم بخير ويارب يجعلكم عتقاء اول اسبوع من رمضان يارب :)




تحياتنا :

ويسبر ,فلونا

Monday, September 3, 2007

بورتو مارينا !






الدخول الى القرية بعشرين جنيه

!!!

دخول الشاطئ بعشرة جنيه
!!!

متوسط ما يدفعه الفرد ليجلس في كافيه 50 جنيه
!!!
فطار الصبح يكلف 50 جنيه
!!!

شراء ( عوامة ) للاطفال يكلف من 80 الى 100 جنيه
!!!

الالعاب على البحر مثل
( jet skii )
تكلف خمسمائة ربعمائة جنيه للساعة
!!!


الاء عبد المنعم تقول : مارينا 100
%

فيروز محمود تقول : هم الناس لو يلبسوا شوية تبقى جامدة

فئة ساخطة غاضبة : بدل المليارات اللي بدفعوها هناك يشوفوا حال الفقرا في الشوارع
!!
فئة مبتهجة سعيدة : بلدنا حلوة الحمد لله وسياحتها زي الفل انا افخر اني انتمي لبلد عاملة مشروع زي كدة
احنا وصلنا للأجانب في شغلنا
!!!
مارينا .. قصص وروايات وحقائق بعضها يؤلم وبعضها يسعد
....


ولنفتح باب النقاش في هذا البوست كان لا بد من العودة الى الوراء والتأمل في تفاصيل الحياة
...

مارينا هل هي مشروع ملوش لازمة زي ما بقول البعض
ام انها نقلة تطويرية من اجل بلدنا
هل مارينا تثبت مقولة مصر جنة الاغنياء وجحيم الفقراء ؟؟
لنعد الى البدايات !!

ستمائة‏ مليون جنيه إجمالي التكلفة الاستثمارية و‏4500‏ فرد حجم العمالة

أربعة شهور ونصف تم الانتهاء من المرحلة الاولي والتي تتضمن اقامة فندق خمس نجوم يحتوي علي‏350‏ غرفة الي جانب‏180‏ متجرا ومجموعة من المطاعم‏

مارينا تعتبر اول ميناء دولي في مصر لاستقبال المراكب واليخوت السياحية
!!
تبعد بورتو مارينا عن القاهرة 240 كيلو
وعن اسكندرية تقريبا 100 كيلو

ومع ذلك كانت حشود القادمين الى مارينا تتحدى اي مسافات
مارينا مدينة جميلة يستيقظ فيها السكان ظهرا ليتناولوا وجبة الغداء ويستمتعوا بمياهها الرائعة
منهم من يأخذ جولة نيلية فاخرة باليخت ليتعرف على معالم مارينا
ومنهم من ينزل الى المياء الدافئة
منهم من ينطلق الى الملاعب الفاخرة
ومنهم من يستمتع بالملاهي المائية العظيمة
للسيدات هناك شاطئ كامل لهن
ليس حمام سباحي بل شاطئ كامل بانشطة كاملة تعد من امتع الانشطة الموجودة

بها 15 مطعم .. مثل : تشيليز - جوني كارينوز - آلان لو نوتر - بينوس - ريترو بالإضافة لمطاعم مصرية ولبنانية وتايلاندية- مول به محلات للماركات العالمية والعديد من الكافيهات-
فنادق بها أكثر من 10 آلاف غرفة-

بها 5 مستشفيات للسياحة العلاجية يشرف عليها أشهر المراكز الطبية العالمية-

مدرسة خاصة لتعليم الغطس ( Diving ) وبها مدربين من سويسرا-
الحياة هناك تستمر حتى الخامسة فجراً ..

حيث يسهر السياح أمام البحر في كافيهات منتظرين شروق الشمسويأخذوا جولتهم في أفخر اليخوت-

ملاعب جولف وتنس .. وملاعب خاصة بالإطفالمن سن 4 إلى 12 سنة ،
بها برامج خاصة للأطفال ..حيث يمكن للأمهات ترك أطفالهم هناك في أمان

وبها ملاعب أخرى للأطفال من 12 إلى 16 سنة وتسمى
mini club


هذه كانت لمحة عن الحياة في مارينا ..
وما خفي كان اعظم
لندخل اعمق من ذلك قليلا ...
اول حاجة خلينا نشوف لمحة عن الاسعار:
في مارينا الطعمية الواحدة بجنيه وربع
وعلبة كانز بيبسي بستة جنيه
عشان تعد في كافيه متوسط اللي بيدفعه الفرد 70 جنيه
ملاهي الاطفال هناك لعبة الطفل لمدة ثلاث دقائق ب 15 جنيه
الليلة الواحدة في شاليه محترم بتبقى بالف جنيه
وطبعا الاسعار دي متفاوتة :)

طيب مارينا الناس ,, تعالوا نخش جوة حياة مارينا نفسها ..
في مارينا الناس معظمهم مصريين واجانب نادر وجود العرب هناك ..
من المعروف ان الممثلين والممثلات والوسط الفني كله بتواجد في مارينا على مدار الصيف
يعني لو عاوز تتصور مع الممثل اللي بتحبه روح مارينا حتلاقيه اكيد هناك
!!!

لما ابتديت اعمل بحث واسأل الناس عن شعب مارينا
تفاوتت الاراء تماما والتبس الامر علي حقيقة
فهناك من لم يعجبه الوضع ومقتنع ان الشعب اصطناعي والناس
(بلاستيك)
من دون ملابس
ومنهم من رأى ان الشعب رائع محب للحياة
سأضع بين ايديكم الاراء جميعها
قالت فيروز محمود :

اللي حسيته وانا هناك ان الناس رايحة تعرض نفسها وفلوسها مش رايحين ينبسطوا !!
لو عاوزة تصيفي وتنبسطي ملكيش غير قرى الساحل الشمالي العادية او مرسى مطروح
!!!
وقالت الاء عبد المنعم :
الناس هناك
friendly
جدا جدا جدا تنبسطي معاهم جدا
وقال وليد مصطفى
:
مينفعش تروحي مارينا لوحدك لازم تبقي وسط شلة من صحابك ساعتها حتتبسطي اوي اوي
واحلى حاجة هناك انك تتمشي وتفكك من الكافيهات
واجمل ما في مارينا لحظات الغروب والشروق متعة تانية خالص لما تتأمل فيها وانت داخل عربيتك
!!
هذه هي مارينا ..
اهتمام فائق بها ومحاولة مستمرة لجعلها اجمل واجمل
هي على شاكلة شرم والغردقة
لو عاوز تصيف حتفكر تصيف في مارينا ؟؟
ليه لأ طالما معاك فلوس
بس غض البصر هناك صعب حاول تحرص على نفسك
والفلوس هناك .. تضيع هباء الريح في سويعات

لكن اليست المليارات التي تدفع من اجل مارينا أولى ان تُدفع من اجل اطفال الشوارع
او مرضى الكبد الوبائي
!!!
أليس من الاولى رصف شوارعنا المحترمة بدل من تلميع مدينة من اجل طبقة الاغنياء ولا دي حاجة ودي حاجة تانية ؟؟

ام ان مصر اصبحت حقا جنة الأغنياء وجحيم الفقراء
الرد بداخل كل فرد منا
...
اترككم الآن في جولة سريعة بين انحاء بورتو مارينا


























Monday, August 27, 2007

حــــــاسّــــة بـــيّــا ؟؟؟

اعلان هام : تم تأجيل بوست بورتو مارينا لظروف السفر وكدة :)
انتظرونا مع حقائق ووقائع اليمة في بوست بورتو مارينا يوم الاحد ان شاء الله ..

طبعا أنا مش بكتب زجل أصلا يعني :D
دة تقدروا تقولوا نوع من الاستهبال
نظام ما بعرفش وهكتب برضه
كنت قريت خاطرة للصديقة ( رانيا ) قريب
وعجبتني الفكرة بتاعتها
فقعدت أكتب شوية ملاحظات وحاجات
في الآخر طلعت البتاعة دي
بس خلاويص
:D



حاسّة بيّا ؟
كل يوم بيمر بينا
يبعدنا أكتر عن بعضنا
يفرق ايدينا
يشوه صور كانت في يوم
حلوة في عينينا


بعد كل ما كان ما بينا
بعد حب زمان جمعنا
كنا نخلق بين قلوبنا
فرحة رايحة وفرحة جايّة
نرسم الحلم الجميل
نمسح الدمعة اللي سايلة
نوعد الوعد ونصونه
نحفظه ولا يوم نخونه
نقتل الشك وظنونه


كان زمان
حب دافي وقلب صافي
و كان وكان
بس راح الحب هان


شوقنا بطل ليه ينادينا
حبنا مات بين ايدينا
فرحنا مابقاش يجينا
حلمنا قدام عينينا بيحتضر
والجرح زاد جوا القلوب بيتحفر
ايام الفرح فين ؟ ... لو تفتكر
قلبي مش قادر ينتظر


طب حاسة بيا ؟
شايفة رجفي اللي في ايديا
شايفة دمعي بين عينيا
طب حاسة بيا ؟
حاسة حزني زاد عليكي
حاسة قلبي اللي انجرح
لما شاف نظرة عينيكي
نظرة باعت حبي ليكي


حاسة بيا ؟
نفسي يرجع جوا قلبك حب ليا
نفسي قلبك يصفى ليا
نفسي أداوي جرحي بيكي
نفسي أرجع تاني ليكي
نفسي يرجع حلمنا تاني بايديكي


ليه سمعتي لما قالوا ليكي عنّي
إني كنت .. أو بإنّي
ليه سمعتي ؟
لما كان ممكن تجيني
تسأليني وتسمعيني
بس مهما قالوا هما
عارفة إنك لسة فاهمة
لسة شايفة ولسة عارفة
سامعة قلبي بيناديكي
حاسة روحي رايحة ليكي


حاسة بيّا ؟
عارفة إني كتير ما بغلط
ساعات في حقي
كتير في حقك
بس دة طول عمره طبعي
وعارفة إن العفو طبعك



كنت بس عايزة أسأل ؟
هي دي نهاية الطريق ؟
كنت بس عايزة أقولك
قلبي من غيرك غريق


حاسة بيّا ؟
لسة ناوية ترجعيلي ؟
قولي بس وريحيني
اكسري الصمت اللي ساجنك
اقتلي الحزن اللي ساكنك
واعلني في وشي القرار
ليه بصمتك تقتليني ؟
قربيني أو ابعديني
بس قولي و ارحميني
علّي بيها يلا صوتك
اخرجي من ليل سكوتك
من السكوت اتهدّ عودك
فاكرة وعدي
فين وعودك ؟


مهما كان هفضل ودايما
حاسة بيكي
ونفسي أكون جمبك وليكي
تحبّي أكونلك إيه وأكون ؟
ريحيني من الظنون
ممكن أبعد لو يهون
والفراق بينا يطول


بس أنا نفسي أقرب
قولك إيه لو نجرب ؟
نرجع الحب القديم
تحسي بيا و أحس بيكي
تكوني ليا وأبقى ليكي
أشيل همومك أخاف عليكي


نفسي أرجع الابتسامة
اللي فارقت يوم ملامحك
ضحكتك ترجع لقلبك
تنسي كل حزن حارقك
تمسحي بالفرح دمعك
يلا قولي و سمعيني
عايزة أسمعك تاني تناديني
بس نادي وتلاقيني
:)

Tuesday, August 21, 2007

بحثت عنك !!






بحثت عنك فلم اجدك

..


اين انت ؟؟
اين انت يا حبيب العمر ؟؟
اين انت يا رفيق الدرب ؟؟
اين انت يا مؤنس وحدتي ؟؟
اين انت يا معذب قلبي وخاطري ؟؟


اين انت يا من وجدت الامان بين يديك
ولمست الحنان داخل عينيك
وسرحت في الخيال مع وجنتيك


دقات قلبي تتسارع ناطقة باسمك
ودموع مقلتاي تتساقط شوقا لهمسك
وعروق جسدي تنبض هاتقة بلمسك
ألا من طبيب مداوٍ لحبك ؟؟
ام تراني اتلذذ بمرض عشقك ؟؟


يا مهجة القلب والروح بك تنادي
عد اليَ فالعمر من دونك بالي
لا زهر يتفتح .. لا شجر نامي
ولا سماء تتصافى لمرأى المحِب المتفاني
حبيبي !! كم تمنيت لو تكُ امامي
تضمني اليك فيتشافى القلبُ الدامي
وتشعر بحرارة دموع محبٍ باكي
يبكيك ويبكي قسوة وظلم الليالي
وزمن يفرق بين خِلَين ولا يبالي


حبيبي !! ليس ذنب مني فلا تقسو
ودع نسمات الهوى منك تدنو
فكيف هي الحياة من دون حب يسمو
وسهما يصيب قلبا بعذاب الحب ليحلو
فمالي أراك تئنُ من اول سهم يرنو
وتحكم علينا بفراق لا يستطيعه قلبُ


عد الى ها هنا فالجروح تتداوى
وظلام الليل بعده فجر يتراءى
وظلال من الدفء لقلوب برادى
وسكينة تطمئننا وهدوء وسلامى


انا مازلت منتظرة .. انا مازلت مشتاقة

انا مازلت احتفظ بأملٍ بين ثنايايا



ملحوظة

( انا مش شاعرة فعلا وعارفة ان مستوى الكلام اقل من دون المستوى :) بس اهي جت فجأة مني وقلت اكتبها هنه لاتقبل النقد الواضح والصرح واللاذع كمان :) )

Sunday, August 5, 2007

تاج مخلل بقاله شهر ونص :D

دة تاج كان جايلي من دكتور عمرو من ييجي شهر ونص كدة ونزل عليا أحله النهاردة
:D

انت مين ؟؟

انسان ..كائن يعيش ويتعايش
هكون مين يعني ؟
ويسبر ... عادي يعني
:D


مين اكتر ست اشخاص بتحبهم ؟؟

ستة ؟
ستة ستة يعني ؟
أولا .......
وبعدين .........
أما الباقي بقى فهما ...............................
أصل يعني صعبة الحكاية دي
دة أنا لو قلت بابا قبل ماما ولا العكس هتحصل زلازل
:D
يبقى مش لازم


انت سعيد؟

أيون الحمد لله
عندي بابا وعندي ماما ومسلمة وفي كلية صيدلة (مع إنه صيدلة مالهاش علاقة بالسعادة )
يبقى I Am happy
:D


لو اجتمعت انا وحسني مبارك في غرفة واحدة؟

سيادة الريس ؟
عمنا كلنا
هقوله يا ريس أنا مش عارفة أودي جمايلك اللي مغرقة البلد دي فين
يا ريس دة البلد دي من غيرك ولا حاجة
دة مفيش ريس زيك في الدنيا كلها
انت مصر ومصر انت
واحنا مش مشكلة
والشعب يقلع عينه عشان خاطر عيونك
بس انت تنبسط وتهيص
بس كدة
هو دة طبعااااااااااااا اللي هقوله
:D

لو معاك مليون ونص جنيه......تعمل بيهم ايه؟
مليون ونص بس ؟
دول يدوب يجيبوا عربية دبليو وصيدلياية صغيرة
وشوية فلوس في البنك عشان الاحتياط
ويمكن ما يكفوش
هو المليون بقت تعمل حاجة في الزمن دة
:D


بتحب مصر؟

أكييييييييييييييييييييييييد
بحبها جدا


بتحب البنات؟

آه طبعا ما أنا بحب صحابي
يبقى بحب البنااات
d:

انت مسلم ؟

اه الحمد لله

ليه؟

ربنا خلقني مسلمة على الفطرة والحمد لله أهلي مسلمين يبقى أنا مسلمة
وما أظنش إني بفكر أبقى غير كدة لأنه هو دة الدين الحق
:)

مين اكتر شخصية ما تقدرش تستغنى عنها في حياتك؟ وليه؟
ممممممم
في كذا حد
بس مبدئيا بابا وماما
ما أتخيلش نفسي من غيرهم بصراحة

ايه اكتر موقف محرج اتعرضت ليه في حياتك؟واتصرفت ازاي؟
موقف محرج
مش عارفة مش بفتكر حاجة معينة
افتكرت واحد
لا لا لا ما ينفعش
آه
مرة كنت قاعدة في سيكشن
فماكناش بنعمل حاجة لأنه دي عادتنا أصلا
بنخلص ونقعد نرغي شوية
فالمهم كنا عمالين نرغي وكل شوية المعيدة تزعق
واحنا بصراحة كنا مش حاطين في بالنا خالص
حتى وهي بتزعق كنا بنتكلم
فالمهم قاعدين أنا وصحابي بنتكلم على دكتورة شريرة عندنا
فأنا قاعدة بحكيلهم على موقف ليا معاها
وفجأة لقيتهم كلهم سكتوا وانا ما أخدتش بالي
ولسة بتكلم
وبعدين أخدت بالي
ببص ورايا



لقيت الدكتورة المتوحشة واقفة ورايا وتنظر إلي شزرا
طبعا أنا كنت مش عارفة أقول إيه
فالمهم قالتلي اسمك ايه ؟
قلتلها الاسم بكل جرأة
قالتلي انتي كنتي بتتكلمي على مين ؟
رحت بكل جرأة برضه
مدرسة كانت بتدرسني
قالت لي بتدرسك فين يعني ؟
قلتلها مش فاكرة
فهي الحمد لله كبرت دماغها وعدت الموضوع
بس خلاص
:D
ايه الأمنية اللي بتدعي ربنا دايما انه يحققها لك؟

الهدااااااااية
ما هو بس ربنا يهديني وكله بعد كدة ممكن يتظبط
:)

تمرر التاج دة لمين؟

امرره

لدكتور نايت وينج أخويا باشا :D

و حراس الحقيقة

:)

Tuesday, July 24, 2007

الثورة وجيلنا !!!




يمكن دي اول مرة اتكلم في حاجة تمت للسياسة بصلة
وأنا عامة مش هتكلم في السياسة
أنا هتكلم بس عن الفجوة بين جيلنا والأجيال اللي قبلنا
جيلنا اللي كل الأجيال الأكبر منا شايفة انه جيل تافه وما يعرفش حاجة ولا يعتد رأيه في أي شئ
حتى في مناقشاتي مع بابا لمست الحكاية دي .. بيسمعني .. وبيسمع رأيي وبيعلق عليه كمان
بس الكلمة اللي لازم تنتهي بيها المناقشة هي .. أصل انتوا صغيرين .. أصل انتوا ما تعرفوش
النهاردة في حلقة العاشرة مساء منى الشاذلي كانت مستضيفة شابين من المدونين
شباب من عمرنا وآراؤهم قريبة إلى حد ما من آراءنا
ومعاهم الشاعر القدير سيد حجاب
كانت عاملة بينهم مناظرة عن رأي كل واحد فيهم في ثورة يوليو
ونتائجها
مبدئيا أنا لمست في الطرفين خوف من ذكر الحقيقة اللي كانت ممكن لو اتقالت تقرب وجهات النظر شوية
الحقيقة إنه الفساد اللي احنا عايشين فيها هو نتيجة حكومة ... نتيجة حاجات كان صعب تتقال في التلفزيون
مع إنها اتقالت بس كتلميحات
اللي الناس دي مش قادرة تفهمه
هو إننا متفهمين سبب حبهم لثورة يوليو
ومدركين كويس الثورة دي عملت ايه لمصر
بس زي ما قلت .. ( متفهمين) بس مش ( حاسين ) لأننا ببساطة ما لمسناش التغيير دة
هما لمسوا الفرق لأنهم عاشوا الفترتين قبل وبعد الثورة
أو على الأقل اتربوا على إن الثورة دي أجمل حاجة في مصر
لكن احنا اتولدنا واتربينا في جو تاني
ما كانش قدامنا وضعين نقارن فيهم .. احنا في نفس الوضع من يوم ما اتولدنا
ما ينفعش إننا نعزل نفسنا عن الواقع عشان نقدر نفهم ثورة يوليو
إيه اللي وصلنا من ثورة يوليو
في ال 55 سنة اللي عدت علىثورة يوليو .. لحد ما عدت السنين دي كلها .. كانت آثار ومبادئ الثورة دي
اختفت وتلاشت ومابقاش ليها أثر تقريبا
فلو كان وضعنا الحالي دة هو نتاج الثورة وأنا لا أعتقد ذلك فالثورة كانت لعنة علينا
الوضع الحالي نتج عن إيه ؟
دة السؤال اللي بنسأله
هل الوضع اللي جيلنا عايش فيه هو امتداد للثورة ؟
يعني لو ماكانتش الثورة حصلت كان الوضع اختلف ؟
هل كان الوضع هيبقى أسوء ولا أحسن ؟
اللي أهالينا والأجيال اللي قبلينا بيحاولوا يوصلوهولنا هو إن الثورة كانت الحل الوحيد الذي لا بديل عنه
الثورة فعلا عملت حاجات كويسة زي مجانية التعليم والمصانع الحربية وغيره وغيره
بس في نفس الوقت الثورة لم تحول مصر من مملكة إلى جمهورية زي ما بيقولوا
لأنه مصر عمر ما كان فيها انتخابات
وعمر ما كان الشعب فيها بيختار الرئيس
لا قبل الثورة ولا بعدها
يعني الثورة لما حطت عبد الناصر رئيس محدش اختاره
الشعب لم يكن له يد في الموضوع من قريب أو بعيد
بغض النظر عن إن الشعب كان عاجبه عبد الناصر
بس اللي حصل انه بعد كدة خلاص محدش بقى يختار ودة ناتج عن إن الثورة ما خليتش حد يختار
يبقى مصر ما تحولتش جمهورية نهائي
والنظام ظل ملكي
جيل الثورة بقى مش قادرين يسمعوا منا الكلام دة ومش قادرين يفهموا ازاي احنا بننتقد الثورة
وبيعتبروا ان دة بسبب اننا ما عشناش الثورة ولا قبل الثورة فما ينفعش نتكلم
شاب من الشباب اللي في الحلقة
قال كلمة حلوة اوي في الآخر
وهي محور كلامي
إن الجيل بتاعنا بقى عنده عزوف عن الكلام مع الناس الكبار في السن
وإنه الأجيال الأكبر منا مش عارفين عنا ولا عن تفكيرنا حاجة
وبالتالي أصبحنا في نظرهم الجيل الهايف التافه اللي لا يفقه أي شئ في أي حتة
ليه يا ترى مش بنحب نتكلم مع الأجيال الأكبر منا ؟
ببساطة لأنهم فعلا مش فاهمين احنا بنفكر ازاي
ومش قادرين يصدقوا إن جيلنا بيعاني برضه
وانه اتولد في عصر زي الزفت
مش عشان مصر حرة ومافيهاش احتلال واحنا ما شفناش جنود الانجليز والفرنسيين يبقى معنى كدة ان كله تمام
لأ في حاجات كتييييير تانية بتخللي الشعب مقهور
في إن الشباب دة كاتم جواه كتير
والهيافة والتفاهة اللي هما شايفينها في الشباب دي مجرد غطا .. ستارة بيحطها الشباب على نفسهم عشان يهربوا بيها من الواقع
مش معنى كدة ان كل الشباب التافهين في الأصل بيفهموا
بس شريحة كبيرة منهم
وأنا جربت أتكلم مع ناس كدة
تظهر قدامك قمة في التفاهة والهيافة
لكن لما دخلت معاهم في مناقشات وحوارات عن حال البلد أو عن حال الشباب أو عن أي حاجة
لقيت ليهم آراء وآراء قوية أوي كمان
دلوقتي هل في حل للفجوة اللي حاصلة بين جيلنا وبين الأجيال اللي قبله ؟
أنا فعلا بعرف أتناقش مع اللي أكبر مني
وبيسمعوني وجايز كمان بيعجبهم رأيي أحيانا
بس لازم في الآخر ينتهي الحوار بكلمة انتي صغيرة
انتوا جيل جديد ما يعرفش حاجة
الحوار في البرنامج انتهى بقصيدة ألقاها الشاعر سيد حجاب
قصيدة فعلا معبرة أوي وماكانش عليها اختلاف
بتتكلم عن حال مصر اللي حاليا مفيش فيه اختلاف بين كبير أو صغير
ويمكن دي نقطة الالتقاء الوحيدة اللي حصلت طوال الماقشة على مدار ساعتين ونص
ودي القصيدة:
سلوا قلبى وقولوا لى جوابا * لماذا حالنا اضحى هبابا
لقد زاد الفساد وساد فينا * فلم ينفع بوليس او نيابه
وشاع الجهل حتى ان بعضا * من العلماء لم يفتح كتابا
وكنا خير خلق الله صرنا * فى ذيل القايمة وف غاية الخيابا
قفلنا الباب احبطنا الشبابا * فادمن او تطرف او تغابى
ارى احلامنا طارت سرابا * ارى جناتنا اضحت خرابا
وصرنا نعبد الدولار حتى * تقول له انت ماما وانت بابا
وملياراتنا هربت سويسرا * ونشحت م الخواجات الديابه
ونهدى مصر حبا بالاغانى * فتملؤنا اغانينا اغترابا
وسيما الهلس تشبعنا عذابا * وتشبعنا جرائدنا اكتئابا
زمان يطحن الناس الغلابة * ويحيا اللص محترما مهابا
فكن لصا اذن او عش حمارا * وكل مشا اذن او كل كبابا
ودس ع الناس اوتنداس حتى * تصير لنعل جزمتهم ترابا
امير الشعر عفوا واعتذارا * لشعرك فيه اجريت انقلابا
وما نيل المطالب بالطيابه * دى مش دنيا يا شوقى بيه دى غاب

Tuesday, July 17, 2007

حكايتي مع الحب !!!




المشهد الأول :

في الاعدادية :
-ماما ماما
انا عاوزة احب واتحب يا ماما
-بس يا بت بطلي قلة ادب لسة بدري على الكلام ده

المشهد الثاني :

في الثانوية :
-ماما ماما
صاحبتي بتحب واحد اسمه كريم
وهوه بحبها اوي يا ماما
-كرييييم !! يا نهارها ابيض
ابعدي عن البت دي حالا
دي بت وحشة واخلاقها وحشة ومش عاوزين نعرف الاشكال دي
-ليه بس يا ماما ده بحبها وبجيبلها هدايا
-يا عبيطة ده بدحك عليها
بكرة تشوفي حيرميها ازاي
..

المشهد الثالث :

في الكلية
-فلونا انتي مش مرتبطة
-لا يا بنتي مرتبطة ايه انا مش بتاعة الكلام ده انا بت طول عمري جامدة
- معقولة يا بنتي لحد دلوقتي مرتبطيش؟
- اه والله مرتبطش ايه كفرت يعني
- لا بس ضاعت عليكي متعة الحياة يعني
- متعة حياة ايه يا بنتي روحوا كدة وانتم طول عمركم خايبين بكرة يرميكم وحبقى اوريكم
( طبعا اقتباس من كلام ماما )


كنت اقول الكلام ده للناس ومن داخلي رغبة داخلية اني احب واتحب
الظاهر رغبة الاعدادية لسة بتلعب في عقلي المسكين
وكنت اعد اتساءل الحب حيخبط بابي ازاي
يفتح الباب مرة واحدة
ولا يخبط طق طق طق بشويش وانا اقوله ادخل
وينطلق خيالي ليرسم صور مضحكة عن دخول الحب شباك قلبي
وانا اعدة في المدرج كدة وفي حالي
ييجي هو بوسامته وجرأته
ويهمس بكل ذوق ورقة
المكان ده فاضي يا دكتورة
وانظر انا الى الارض خجلا


ايوة طبعا اتفضل يا دكتور
وتبتدي المحاضرة
واحنا عقولنا مش فيها اساسا
كل واحد بيسرق نظرات بريئة لمن جواره
ونبتسم ابتسامة طفل حصل على قطعة حلوى اذا استطاع ان يختلس نظرة
ونعد نرسم قلوب على السكتش كدة واحنا مبسوطين اوي



ايه يا عم الكلام الرومانسي الخنيق ده
مدرج وكرسي فاضي ونظرات
واخرها يعيشوا في تبات ونبات
ويخلفوا صبيان وبنات
ونفضت الفكرة من عقلي بسرعة

طب وامال ايه يا فلونا ؟؟

ابقى انا واقفة مع صحابي
اعدين بنتكلم وندحك بطريقة رقيقة جذابة
ويأتي هو مع اصحابه وهم يتقاذفون النكت والضحكات
وينظر اليي
وينظر وينظر
ثم يفيق لنفسه بسرعة
ويسأل اللي حوليه
مين دي !!
دي رقيقة اوي
دي خطفت قلبي من نظرة عين
هيه دي فتاة احلامي


مممممممممممممممم
لا مش ده اللي بيحصل خالص
حوال الحب من اول نظرة ده تلاقيه في فيلم نهر الحب
عمر الشريف وفاتن حمامة وكدة
تعب عقلي من التفكير فتركت الامر بجلته
بلا حب بلا بطيخ والله ماما كان عندها حق


وجاءت السنة الثانية في الكلية
وانضميت في سكني لمجموعة من البنات جميلين اوي بجد
حبيتهم وحبوني وابتدينا نتشارك تفاصيل حياتنا مع بعض
لأفوجأ
اني انا الوحيدة
التي تعيش بلا حب
!!!!



وابتدت قصص الحب تحاربني من جديد
فهذه صديقتي تحب شاب اقل منها في المستوى المادى والاجتماعي بكثير
بس بتحبه اوي
طيب يا اميرة ده من عالم وانتي من عالم تاني !!
-بحبه يا فلونا بحبه هئ هئ
- خلاص يا عم خليكي انتي نعناعة وهوه لمون وحتتجوزوا تحت اشراف كلوس اب ان شاء الله



وهذه اخرى تقع في شرك زميلها ليتبادلوا الهدايا والكلمات الحسان
ويتفقوا على قراية فاتحة في الصيف
!!
الف مبروك ربنا يتمملكم على خير ( وانا مذهولة )


ومرة واحنا نايمين في منتصف الليل
سمعنا صراخ هائل في المبنى السكني خلانا كلنا نصحى مفزوعين
صراخ وصراخ وصراخ من بنوتة مش عارفين حصلها ايه
كل البنات بتجري رايحين يشوفوا في ايه
انا قلت البنت اكيد حد من اهلها مات او حاجة
ورحنا هديناها ورجعنا واحنا الفكرة مش واضحة عندنا هيه مالها
لما نسأل يقولولنا عندها انهيار عصبي ..
طبعا انا وصحابي الكلام ده ميخلش علينا
انهيار عصبي ايه ماهو لازم يبقى فيه سبب
فضلنا نلف وندور
وتاني يوم جاء الخبر اليقين
البنت خرجت من قصة حب فاشلة !!
يا عيني يا بنتي تصدقي صعبتي عليا ( سمايلي يعبر عن الذهول التام )




واحد تاني نعرفه
بحب واحدة جدا
ولكنه يصغرها بعامين
اهله طبعا مش موافقين
الولد يمتنع عن الاكل والشرب تماما لحد لما اهلوا وافقوا
ده ايه الجدعنة دي بس
:) :)
وبعد كل هذه التجارب التي لم اعرض الا القليل منها
اصبح معنى الحب مختلط تماما عندي ..
واصبحت كلمة بحبك ترتبط عندي بكلمة بهدلة
ومعاني اخرى مبهمة تماما
فتارة اضحك على ما يفعله الحب بالناس
وتارة اخرى ابكي على عذاب الناس مع الحب
وتارة اشعر ان الحب هو من ظُلم مع الناس
!!!

فهذا زميلي يحب حبا صامتا
يكاد قلبه يتقطع من حبه لفلانه
ولكن كيف السبيل اليها ؟؟
عندما ينظر اليها تفضحه عيناه وهو يهيم بها حبا
ولكن حياءه وظروفه يمنعه من ان يحيطها بالخبر !!
ويعترف لها بجريمته ..
كأنه يعتبر الحب جريمة
وكلمة انا احبك معناها انا مجرم


وهذا اخر يلعب بالبنات لعب
يوهم هذه بالحب ويتركها
ويخرج مع تلك ويقدم الهدايا لذاك
والحياة ماشية معاه عسل
بس اسود
!!

ولو رجعنا لكلمة الحب حنلاقيها كلمة طاهرة
لكن اللي بيحصل في مجتماعتنا دلوقتي شوهوا معناها
قصص حب وحوارات وارتباطات بعيدة عن الدين وبعيدة عن الاسلام
شباب بحب ومش عارف يتجوز مشاعره مكبوتة ومش عارف يقولها لمين
بنات مستنية فارس الاحلام ومستنية ومستنية
والباب ساكت ما بخبطش !!
وتضيع احلامها وسط زحمة الحياة
!!!



ناس بتقولك يعني ايه حب
وناس تقولك ده كلام فارغ يا عم
وناس تقولك ادينا بنقضيها
وناس تقولك الحب بهدلة
وناس تقولك انا عاوز اتجوز وخلاص
!!
وانا وسط هذا الخضم العظيم اغرق ولا اجد في عقلي جوابا لسؤالي
هوه ايه السؤال بقى
مش عارف ّ!!
ونرجع ونقول لا تفقد الأمل رب قشرة موز جمعت بين حبيبين
:D :D

Saturday, July 14, 2007

حينها فقط أدركت الحقيقة


هذه الخاطرة ليس لها موضوع محدد
فقط أتحدث عن المرات التي أدركت فيها حقيقة شئ ما
ولكن متأخرا جدا
بعدما يفوت الأوان
ويكون قد كان ما كان ولا سبيل للعودة
حينما أتخذ قرارات عشوائية لأكتشف أنني كنت مخطئة
وأن حساباتي قد أخفقت هذه المرة
حينما لا أجد الوقت الكافي لأعد العدة لشئ ما
وتكون النتيجة .. هي الفشل بكل المقاييس
حينما أخادع نفسي مرارا وتكرارا بخصوص شعور ما
وفجأة يصدمني الواقع
ليكشف لي الحقيقة كاملة
الحقيقة التي قد أكون أعرفها
ولكني لم أدركها جيدا ولم أترك لنفسي الفرصة للتفكير في عواقب خداع الذات الذي أمارسه مع ذاتي المسكينة
أضع مخططات لإخفاء الحقيقة عن نفسي
وقد تأتيني الحقيقة متمثلة في حلم أو رؤيا
أن استيقظي .. إلى متى ستخفين عن نفسك الواقع
وقد تأتيني في صورة مواقف تذكرني بالحقيقة التي أحاول أن أتناساها جاهدة
أبسط الأمثلة
الصداقة
هذه الكلمة لطالما كان لها أثر في حياتي
فلم يكن يوما الأصدقاء بالنسبة لي رفقاء دراسة
وإنما كانوا جزءا من حياتي
ولذلك كنت عادة ما أختار صداقاتي بعناية
لأن من أكثر الأشياء التي تؤلمني
هو أن أخسر الأصدقاء لأني أسأت الاختيار من البداية
نجحت خياراتي مرة وأخفقت مرارا
لكني في النهاية كنت أخرج بصديقة أو اثنين من أصل عشرة أو عشرين
وهذا يكفيني
عندما انتقلت إلى التعليم الجامعي
ورأيت ذلك المجتمع الجديد الذي لم أكن أعرف عنه شيئا
للأسف تناسيت قواعدي الراسخة ومبادئي التي لا أقبل بالتخلي عنها في اختيار أصدقائي
لسبب ما .. توقفت عن الاختيار
وأصبحت أترك الأمر للظروف والمصادفات
والنتيجة فشل ذريع
احدى الصداقات فشلت لعدم الاتفاق بين الطرفين
وتلك كانت أهونهم
بقينا زملاء لكن ذاب رابط الصداقة مع الوقت
وتارة اخرى بسبب ظروف الحياة و بعد المسافات وقد كان الأمر قاسيا بعض الشئ
حيث أني أعلم أن هذه الصديقة مناسبة لي ولكن الظروف تصعب الأمر علي
وبالتالي رغما عني ضعفت الروابط شيئا فشيئا
أما المرة الثالثة
فهي التي أشعرتني بحق
أنني ساذجة ,وأني أدرك حقائق الأمور متأخرا جدا
كيف لي أن أعتقد باخلاص شخص ما لمدة عام ونصف
فقط لأكتشف في النهاية أن الأمر لم يكن أكثر من بعض المصالح
ربما لأني لم أظن يوما أن هناك مصلحة شدبدة قد تربط أحدا ما بي
قد يكون هذا تقليلا من نفسي
لكني حقا لم أفكر أن هناك شئ قوي عندي يجعل أحدا ما يصادقني للمصلحة
فكانت تلك الطعنة الأخيرة التي جعلتني أدرك الحقيقة ... ولكن متأخرا
اضطررت هذه المرة أن أنهي الأمر بطريقة لم أكن لأستخدمها أبدا
قطعت العلاقة وإلى الأبد
لكن هذه الضربة جعلتني أدرك
أنه لا يمكن أن أختار الأصدقاء بالتجربة
أو بطريقة .. أصيب أو أخطئ
ربما كانت ضربة قوية قليلا جعلتني انهار لفترة
ولكني وجدت من يقف بجواري
اشخاص حاولوا اظهار الحقيقة لي مرارا وتكرارا
لكني كنت أظن أنهم كلهم أشرار
وفقط يريدون أن يفرقوا بيني وبين أصدقائي المخلصين
لا أخفي سرا أنه كان هناك أكثر من موقف الواحد منهم كفيل بقطع علاقتي للأبد بهؤلاء الأشخاص
ولكن لأسباب لا أعلمها
كنت ساذجة وتعاملت مع هذه المواقف بافتراض حسن النية عند الآخرين
وهي قاعدة لا يمكن تطبيقها في هذا الزمن
هذا لا يعني أن جميع البشر أشرار
ولكن للأسف
افتراض حسن النية أوقعني في عدد لا بأس به من المصائب
في شهر أبريل الماضي
وتحديدا بتاريخ 11/4
قررت حسم كل قراراتي ووضع حد لسذاجتي
ووضع الخطوط الحمراء التي كنت قد تخليت عن بعضها مع بداية حياتي الجامعية
قررت أن أقف مع نفسي وقفة
وأعود كما كنت
خطوطي الحمراء لا يحق لأحد أن يتعداها
ومن يحاول فلن أؤذيه لأن هذا ليس من طبعي ( وإن كان البعض يظن أنه من طبعي )
ولكن سأعلمه قدره
كان هذا التاريخ هو تاريخ الحادثة الأخيرة
حين تخلى عني من أعطيتهم ثقتي
حين كنت أفقد الوعي في الوقت الذي كانوا هم يبحثون عن مصلحتهم حتى لو كان في هذا هلاكي
حين اكتشفت أن صداقتي لهؤلاء يمكن أن تنسى و تنهار أمام بضعة أوراق أو أقل
حينها قررت قطع كل علاقاتي القديمة
والبدء من جديد
بنفس صافية
ولكن ليست ساذجة
ورفعت شعار ( الناس ليسوا ملائكة ) فلن أتعامل على هذا الأساس من جديد
فقط لكي لا أقع في الموقف الذي لا أحبه
ادراك الحقيقة متأخرا

Saturday, July 7, 2007

مقلب مقلب يعني :D


امبارح عملت أكبر مقلب ممكن أعمله في حياتي .

بجد كنت سعيدة جداااااااااا انه اتنفذ صح جدااا

عملته في واحدة كدة أعرفها معرفة سطحية

بس أحلى حاجة اني دحكت بجد كتيييييير جدا

أجيبلكم بقى القصة من أولها

ناس كتير تعرف إن أنا وفلونا صحاب من الامارات

من واحنا في تانية ثانوي واحنا صحاب وكنا مع بعض في فصل واحد في الدراسة

بس بعد ما جينا مصر بقت هي في اسكندرية وأنا في القاهرة

فبقت مقابلتنا بتقتصر على الأجازات

وبرضه في الامارات

بس المرة دي حصلت دربكة في مواعيد سفرنا بسبب ان امتحاناتها خلصت بدري وأنا خلصت متأخر جدا

فهي سافرت الامارات تحديدا يوم 6/18

ساعتها أنا كنت لسة في عز الامتحانات

المهم أنا قررت أقعد شهر في مصر بعد الامتحانات

عشان تدريب وحاجات كدة

وفلونا اتدايقت شوية من القرار دة

.لأني كدة من الآخر طنشتها خااااااااااالص

بس أنا لسبب ما ما فكرتش

وبابا حجزلي تذكرة تحديدا يوم 7/31

وبقيت لسبب مجهول في خناقات دائمة مع فلونا على الماسنجر

وأنا كنت أتدايق وأقوم من على الكمبيوتر

المهم إن الأسباب كانت تافهة إلى أقصى الحدود

بس هو احنا كدة لما كل واحدة فينا تبقى في بلد

بنتخانق

المهم أنا اكتشفت إنه التدريب بتاعي مش هينفع إلا في شهر 9

وأنا كدة كدة مش ببقى في مصر في شهر تسعة

فطقت في دماغي أسافر مع بابا الامارات

وبابا كان مسافر يوم
7/5
فقلت لبابا

وكانت تذكرتي محجوزة على شركة غير اللي بابا تذكرته محجوزة عليها

ورغم كدة خلال يوم واحد كنت خلاص تذكرتي اتحجزت

و كل دة وفلونا ما تعرفش إنيرايحة الامارات

المهم أنا رحت مكلمة فلونا وقلتلها إني عايزة ايميل أختها الصغيرة

البنوتة دي زي العسل وكنت عارفة إنها هتتعاون معايا

وفعلا كلمت أختها

واتفقنا إني هآجي الامارات وهأطب على فلونا فجأة

المهم يوم الخميس وصلت الامارات

واتصلت بأخت فلونا واتفقنا إني هنط عليها يوم الجمعة آخر النهار

يوم الخميس بقى كنت قاعدة بكلم فلونا على النت

بس طبعا على أساس إني في مصر مش في الامارات

وهي عمالة تسألني

هو باباكي سافر ؟

وأنا أرد عليها وأنا فطسانة من الدحك

آه يا فلونا سافر النهاردة الصبح والبيت فضي خلاص

لأا وبابا وماما كان صعبان عليهم البنية أوي

وعمالين يقولولي حرام عليكي

البنت كدة ممكت تتسرع بطلي دحك عليها

بس بجد دحكت كتير جدا

المهم جااااااااااااااااااااء الموعد المنتظر

وصلت عند باب العمارة

ورح متصلة بأختها ( شريكتي في الجريمة ) عشان تفتحلي الباب

وفعلا طلعت وسلمت عليها

ودخلتني بقى على فلونا جوا في الأوضة

كانت قاعدة في أمان الله ومامتها وأختها الكبيرة موجودين

طبعا هي شافت وشي من هنا

ولقيتها برقت واتصدمت وما حطيتش منطق

وعمالة تبصلي باستغراب شديد وعنيها مبرقة

ومصدومة يا عيني وأنا عمالة أدحك

وهي بقى مخها عمالة يلف ويدور

أنا جيت من مصر امتى وازاي ؟

المهم سلمت على مامتها وأختها وهي لسة بتبصلي بصدمة

كانت مخضوضة بجد

طلعت أنا وهي نقعد في الصالة

البنت من كتر الصدمة كانت هتقطع علاقتها بيا

مش مصدقة إنها اندحك عليها كدة

أحلى حاجة في المقلب دة

انه اتنفذ بمنتهى الدقة

من غير ولا غلطة

وأخت فلونا عرفت تكتم على الموضوع أسبوع كامل من ساعة ما اتفقنا

وكل ما فلونا تسألها انتي بتقولي إيه لويسبر

تروح مخترعالها أي حجة كدة

بس بجد أنا دحكت كتيييييييييييييييييييير جدااااااااااا امبارح

أصل دي أول مرة أنفذ مقلب بالدقة دي


بس كدة

فلونتي حبيبتي بقى
تعيشي وتاخدي غيرها يا حبي

Thursday, July 5, 2007

اوف لايــــن ..


اعزف انغام الحزن على اوتار قلبي المكسور
السواد يحيط بي يلفني ويعتصرني بقوة
وقلبي يرقص طربا على انغام موته
فقرار اعدامه قد صدر
وعذابه آن له ان ينتهي
!!!


من ينتشلني من وحدتي
؟؟؟
من يشعر بي في حزني وانا اتعذب وحدي
؟؟؟
دعوني .. دعوني
فالأمل تلاشى من قلبي
!!!


نعم هذه هي رغبتي
!!









تركوني وحيدة
..

تركوني فقيرة

..

تركوني وعذابي يمزقني

!!!

تركوني ولم يفكر احدهم ان يلتفت وراء ظهره ليرمقني بنظرة وداع اخيرة
!!!

تركوني يا قلب بعد ما كسروك

فكان اعدامك رحمة بي وبك

!!!!




نظرت لاعلى لعلني اجد خلاصي
..

ناديت وصرخت
فما من مجيب لندائي
...

رفعت يدي استنجد بمن يرفعني الى النور

...

ولكن لا امل فكياني مجهول

....


نعم هذه انا


...

فقد اعدموك يا قلبي واحتلت القسوة كياني
...