Sunday, August 5, 2007

تاج مخلل بقاله شهر ونص :D

دة تاج كان جايلي من دكتور عمرو من ييجي شهر ونص كدة ونزل عليا أحله النهاردة
:D

انت مين ؟؟

انسان ..كائن يعيش ويتعايش
هكون مين يعني ؟
ويسبر ... عادي يعني
:D


مين اكتر ست اشخاص بتحبهم ؟؟

ستة ؟
ستة ستة يعني ؟
أولا .......
وبعدين .........
أما الباقي بقى فهما ...............................
أصل يعني صعبة الحكاية دي
دة أنا لو قلت بابا قبل ماما ولا العكس هتحصل زلازل
:D
يبقى مش لازم


انت سعيد؟

أيون الحمد لله
عندي بابا وعندي ماما ومسلمة وفي كلية صيدلة (مع إنه صيدلة مالهاش علاقة بالسعادة )
يبقى I Am happy
:D


لو اجتمعت انا وحسني مبارك في غرفة واحدة؟

سيادة الريس ؟
عمنا كلنا
هقوله يا ريس أنا مش عارفة أودي جمايلك اللي مغرقة البلد دي فين
يا ريس دة البلد دي من غيرك ولا حاجة
دة مفيش ريس زيك في الدنيا كلها
انت مصر ومصر انت
واحنا مش مشكلة
والشعب يقلع عينه عشان خاطر عيونك
بس انت تنبسط وتهيص
بس كدة
هو دة طبعااااااااااااا اللي هقوله
:D

لو معاك مليون ونص جنيه......تعمل بيهم ايه؟
مليون ونص بس ؟
دول يدوب يجيبوا عربية دبليو وصيدلياية صغيرة
وشوية فلوس في البنك عشان الاحتياط
ويمكن ما يكفوش
هو المليون بقت تعمل حاجة في الزمن دة
:D


بتحب مصر؟

أكييييييييييييييييييييييييد
بحبها جدا


بتحب البنات؟

آه طبعا ما أنا بحب صحابي
يبقى بحب البنااات
d:

انت مسلم ؟

اه الحمد لله

ليه؟

ربنا خلقني مسلمة على الفطرة والحمد لله أهلي مسلمين يبقى أنا مسلمة
وما أظنش إني بفكر أبقى غير كدة لأنه هو دة الدين الحق
:)

مين اكتر شخصية ما تقدرش تستغنى عنها في حياتك؟ وليه؟
ممممممم
في كذا حد
بس مبدئيا بابا وماما
ما أتخيلش نفسي من غيرهم بصراحة

ايه اكتر موقف محرج اتعرضت ليه في حياتك؟واتصرفت ازاي؟
موقف محرج
مش عارفة مش بفتكر حاجة معينة
افتكرت واحد
لا لا لا ما ينفعش
آه
مرة كنت قاعدة في سيكشن
فماكناش بنعمل حاجة لأنه دي عادتنا أصلا
بنخلص ونقعد نرغي شوية
فالمهم كنا عمالين نرغي وكل شوية المعيدة تزعق
واحنا بصراحة كنا مش حاطين في بالنا خالص
حتى وهي بتزعق كنا بنتكلم
فالمهم قاعدين أنا وصحابي بنتكلم على دكتورة شريرة عندنا
فأنا قاعدة بحكيلهم على موقف ليا معاها
وفجأة لقيتهم كلهم سكتوا وانا ما أخدتش بالي
ولسة بتكلم
وبعدين أخدت بالي
ببص ورايا



لقيت الدكتورة المتوحشة واقفة ورايا وتنظر إلي شزرا
طبعا أنا كنت مش عارفة أقول إيه
فالمهم قالتلي اسمك ايه ؟
قلتلها الاسم بكل جرأة
قالتلي انتي كنتي بتتكلمي على مين ؟
رحت بكل جرأة برضه
مدرسة كانت بتدرسني
قالت لي بتدرسك فين يعني ؟
قلتلها مش فاكرة
فهي الحمد لله كبرت دماغها وعدت الموضوع
بس خلاص
:D
ايه الأمنية اللي بتدعي ربنا دايما انه يحققها لك؟

الهدااااااااية
ما هو بس ربنا يهديني وكله بعد كدة ممكن يتظبط
:)

تمرر التاج دة لمين؟

امرره

لدكتور نايت وينج أخويا باشا :D

و حراس الحقيقة

:)

19 comments:

radwa said...

التاج المخلل اجاباته رائعه جدا
وموفقه

WhiSpeR said...

ربنا يكرمك ويجبر بخاطرك يا بنتي
اجابات إيه بس ؟
دة أنا كنت مهيسة جدا امبارح بالليل وأنا بكتبهم
وقريتهم دلوقتي قعدت أدحك على نفسي
:D

FloNa said...

loooooooooooooooool

mnen eltag da ya bentyyyyy

fakartene b tegan kteeeeeer mn kroooon :D

المجاهدة said...

دة أنا لو قلت بابا قبل ماما ولا العكس هتحصل زلازل


loool
:d
aywa ana shahda bardo :D

WhiSpeR said...

aywa ana shahda bardo :d


في سمايلي على الماسنجر
انتي بتحبيه مووووووت
بس مش عارفة طبعا أجيبه هنا
بس انت عارفاه
بحطلك منه كتير
اعتبريني حطيته
:d



@ flona
لأ دة انتي حليتيه قبلي
دوري على الباقيين بقى
:)

Sally said...

ايجاباتك جميلة ياويسبر
بس
انتي اجمل
:D

WhiSpeR said...

ربنا يكرمك يا قمر
وأنا أقوووول دخلت البلوج لقيته منور ليه ؟
أتاري القمر جه عندنا
منورة يا توتة
:D

Anonymous said...

حلو الموقف المحرج جدا
افتكرت موقف زيه كنت فى فرح ودوشه وهيصه وجمبى واحد معرفه كان عمال يتريق على العريس او العروسه مش فاكره وانا كنت ماسكه الكاميرا وبصور فيديو وانا وهو مش واخدين بالنا ان كل النم طاااااالع فى التصوير ... ده غير ان الفرح فجأه سكتم بكتم بس الحمد لله سكتنا فى الوقت المناسب
وشكرا على التاج ... كده هنخسر بعض قبل ما نعرف بعض اصلا :]

WhiSpeR said...

لا يا قطة نخسر بعض ليه ؟
دة أنا بموووووووووووووووت في المواقف دي
البلوج منور بيكي والله
:D

noha said...

تاج مخلل

وده اللى مخلى طعمه حلو

:D

جميلة الاجابات يا وسبورتى

:)

catroz said...

ههههههههههههههههههه

تصدقى التاج ده مخلل عندى بقاله بتاع سنتين
:D

عمر عاشق القرآن said...

اجاباتك جميلة ..

واسمحيلى اقولك كمان البوست بتاع "حكايتى مع الحب" عجبنى اوى

mohamed said...

حلو وصف الدكتورة بالمتوحشة

فعلا كلهم كدا

محمود الدوح said...

ياه لو كان معاة حتة طعمية وطبق فول كان هيبقى المخلل لية طعم تانى

بهزر طبعا

اجابات موفقة جدا

محمد said...

ما شاء الله

جميل جدا
:)

Anonymous said...

mesh ha2olek ana men 7azary fazary
:D

bas egabat gamda ya whispeer ana ftest mnek
to7fa loool

Anonymous said...

بجد اسلوبك رائع و ردك علي التاج داخل دماغي قوي و بجد خرجني من المود اللي انا فيه
و عايز اقولك علي موقف ظريف حصل و انا بقراء قراءة كلمت الهدايه علي انا هدايا.

اللهو الخفى said...

بجد اسلوبك رائع و ردك علي التاج داخل دماغي قوي و بجد خرجني من المود اللي انا فيه
و عايز اقولك علي موقف ظريف حصل و انا بقراء قراءة كلمت الهدايه علي انا هداي

نداء خفي said...

إجابات كويسة :D

كنت عايزة أسلم عليكي إنتي وفلونا

وأقولكم إن مدونتكم دمها خفيف وظريفة وده المتوقع يعني D:



التوقيع : اخت في الله من كل الطلبة
ربنا يرجعه بالسلامة عشان وحشنا بقى