المشهد الأول :
في الاعدادية :
-ماما ماما
انا عاوزة احب واتحب يا ماما
-بس يا بت بطلي قلة ادب لسة بدري على الكلام ده
المشهد الثاني :
في الثانوية :
-ماما ماما
صاحبتي بتحب واحد اسمه كريم
وهوه بحبها اوي يا ماما
-كرييييم !! يا نهارها ابيض
ابعدي عن البت دي حالا
دي بت وحشة واخلاقها وحشة ومش عاوزين نعرف الاشكال دي
-ليه بس يا ماما ده بحبها وبجيبلها هدايا
-يا عبيطة ده بدحك عليها
بكرة تشوفي حيرميها ازاي
..
المشهد الثالث :
في الكلية
-فلونا انتي مش مرتبطة
-لا يا بنتي مرتبطة ايه انا مش بتاعة الكلام ده انا بت طول عمري جامدة
- معقولة يا بنتي لحد دلوقتي مرتبطيش؟
- اه والله مرتبطش ايه كفرت يعني
- لا بس ضاعت عليكي متعة الحياة يعني
- متعة حياة ايه يا بنتي روحوا كدة وانتم طول عمركم خايبين بكرة يرميكم وحبقى اوريكم
( طبعا اقتباس من كلام ماما )
كنت اقول الكلام ده للناس ومن داخلي رغبة داخلية اني احب واتحب
الظاهر رغبة الاعدادية لسة بتلعب في عقلي المسكين
وكنت اعد اتساءل الحب حيخبط بابي ازاي
يفتح الباب مرة واحدة
ولا يخبط طق طق طق بشويش وانا اقوله ادخل
وينطلق خيالي ليرسم صور مضحكة عن دخول الحب شباك قلبي
وانا اعدة في المدرج كدة وفي حالي
ييجي هو بوسامته وجرأته
ويهمس بكل ذوق ورقة
المكان ده فاضي يا دكتورة
وانظر انا الى الارض خجلا
ايوة طبعا اتفضل يا دكتور
وتبتدي المحاضرة
واحنا عقولنا مش فيها اساسا
كل واحد بيسرق نظرات بريئة لمن جواره
ونبتسم ابتسامة طفل حصل على قطعة حلوى اذا استطاع ان يختلس نظرة
ونعد نرسم قلوب على السكتش كدة واحنا مبسوطين اوي
ايه يا عم الكلام الرومانسي الخنيق ده
مدرج وكرسي فاضي ونظرات
واخرها يعيشوا في تبات ونبات
ويخلفوا صبيان وبنات
ونفضت الفكرة من عقلي بسرعة
طب وامال ايه يا فلونا ؟؟
ابقى انا واقفة مع صحابي
اعدين بنتكلم وندحك بطريقة رقيقة جذابة
ويأتي هو مع اصحابه وهم يتقاذفون النكت والضحكات
وينظر اليي
وينظر وينظر
ثم يفيق لنفسه بسرعة
ويسأل اللي حوليه
مين دي !!
دي رقيقة اوي
دي خطفت قلبي من نظرة عينهيه دي فتاة احلامي
مممممممممممممممم
لا مش ده اللي بيحصل خالص
حوال الحب من اول نظرة ده تلاقيه في فيلم نهر الحب
عمر الشريف وفاتن حمامة وكدة
تعب عقلي من التفكير فتركت الامر بجلته
بلا حب بلا بطيخ والله ماما كان عندها حق
وجاءت السنة الثانية في الكلية
وانضميت في سكني لمجموعة من البنات جميلين اوي بجد
حبيتهم وحبوني وابتدينا نتشارك تفاصيل حياتنا مع بعض
لأفوجأ
اني انا الوحيدة
التي تعيش بلا حب
!!!!
وابتدت قصص الحب تحاربني من جديد
فهذه صديقتي تحب شاب اقل منها في المستوى المادى والاجتماعي بكثير
بس بتحبه اوي
طيب يا اميرة ده من عالم وانتي من عالم تاني !!
-بحبه يا فلونا بحبه هئ هئ
- خلاص يا عم خليكي انتي نعناعة وهوه لمون وحتتجوزوا تحت اشراف كلوس اب ان شاء الله
وهذه اخرى تقع في شرك زميلها ليتبادلوا الهدايا والكلمات الحسان
ويتفقوا على قراية فاتحة في الصيف
!!
الف مبروك ربنا يتمملكم على خير ( وانا مذهولة )
الف مبروك ربنا يتمملكم على خير ( وانا مذهولة )
ومرة واحنا نايمين في منتصف الليل
سمعنا صراخ هائل في المبنى السكني خلانا كلنا نصحى مفزوعين
صراخ وصراخ وصراخ من بنوتة مش عارفين حصلها ايه
كل البنات بتجري رايحين يشوفوا في ايه
انا قلت البنت اكيد حد من اهلها مات او حاجة
ورحنا هديناها ورجعنا واحنا الفكرة مش واضحة عندنا هيه مالها
لما نسأل يقولولنا عندها انهيار عصبي ..
طبعا انا وصحابي الكلام ده ميخلش علينا
طبعا انا وصحابي الكلام ده ميخلش علينا
انهيار عصبي ايه ماهو لازم يبقى فيه سبب
فضلنا نلف وندور
وتاني يوم جاء الخبر اليقين
البنت خرجت من قصة حب فاشلة !!
يا عيني يا بنتي تصدقي صعبتي عليا ( سمايلي يعبر عن الذهول التام )
واحد تاني نعرفه
بحب واحدة جدا
ولكنه يصغرها بعامين
اهله طبعا مش موافقين
الولد يمتنع عن الاكل والشرب تماما لحد لما اهلوا وافقوا
ده ايه الجدعنة دي بس
:) :)
وبعد كل هذه التجارب التي لم اعرض الا القليل منها
اصبح معنى الحب مختلط تماما عندي ..
واصبحت كلمة بحبك ترتبط عندي بكلمة بهدلة
ومعاني اخرى مبهمة تماما
فتارة اضحك على ما يفعله الحب بالناس
وتارة اخرى ابكي على عذاب الناس مع الحب
وتارة اشعر ان الحب هو من ظُلم مع الناس
!!!
فهذا زميلي يحب حبا صامتا
يكاد قلبه يتقطع من حبه لفلانه
ولكن كيف السبيل اليها ؟؟
عندما ينظر اليها تفضحه عيناه وهو يهيم بها حبا
ولكن حياءه وظروفه يمنعه من ان يحيطها بالخبر !!
ويعترف لها بجريمته ..
كأنه يعتبر الحب جريمة
وكلمة انا احبك معناها انا مجرم
وهذا اخر يلعب بالبنات لعب
يوهم هذه بالحب ويتركها
ويخرج مع تلك ويقدم الهدايا لذاك
والحياة ماشية معاه عسل
بس اسود
!!
ولو رجعنا لكلمة الحب حنلاقيها كلمة طاهرة
لكن اللي بيحصل في مجتماعتنا دلوقتي شوهوا معناها
قصص حب وحوارات وارتباطات بعيدة عن الدين وبعيدة عن الاسلام
شباب بحب ومش عارف يتجوز مشاعره مكبوتة ومش عارف يقولها لمين
بنات مستنية فارس الاحلام ومستنية ومستنية
والباب ساكت ما بخبطش !!
وتضيع احلامها وسط زحمة الحياة
!!!
ناس بتقولك يعني ايه حب
ناس بتقولك يعني ايه حب
وناس تقولك ده كلام فارغ يا عم
وناس تقولك ادينا بنقضيها
وناس تقولك الحب بهدلة
وناس تقولك انا عاوز اتجوز وخلاص
!!
وانا وسط هذا الخضم العظيم اغرق ولا اجد في عقلي جوابا لسؤالي
هوه ايه السؤال بقى
مش عارف ّ!!
ونرجع ونقول لا تفقد الأمل رب قشرة موز جمعت بين حبيبين
:D :D
45 comments:
السؤال هو
"ماذا يفعل الشباب ؟؟"
والإجابة
لنا الله
:D
طيب
دلوقتي أنا عادة بيتقال عليا الفتاة الواقعية .. المنطقية
من النوع اللي ما بيحبش الرومانسية الحالمة
اللي عااادة بتؤدي بأصحابها إلى طريق مش ظريف
وأنا هنا مش بتكلم عن الحب بجد
لأ ... أنا بتكلم عن الرومانسية ( الحالمة ) حوارات اليسا وتامر حسني
بحس بسذاجة أوي في الحاجات دي
وبحس إن البنت بتبقى عبيطة أوي
مش معنى كدة إني مش بحس
أو إن مشاعري مش بتتحرك
لأ اطلاقا
أكيد مشاعري بتتحرك
بس الفكرة إن عقلي بيتحرك بعديها بشوية صغيرين
عقلي اللي موجود عشان يتحكم في قلبي
القلب ما ينفعش يبقى ربان السفينة
ولو دة حصل
النتائج مش هتكون مرضية أبدا
مش هقول إني مش زي البنات وإني مش بفكر في أي حاجة من دي
مفيش بنت مش بتفكر في المعاني دي
بس الفكرة في التحكم
في السبطرة
إذا ما قدرتش أسيطر على قلبي
مش هقدر أسيطر على أي حاجة
السؤال اللي بتسأليه يا فلونا
هو مش سؤال
هو مجموعة اسئلة
مثلا : هو أنا هحب ولا هفضل كدة ؟
ما أظنش انك عمرك ما حبيتي أكيد حصل حتى لو في أولى ابتدائي
الحب الحقيقي بقى اللي بتدوري عليه
أظن احنا عارفين معاده كويس
أو على الأقل عارفين الظروف
عن المصادفات
قد تحدث
بس المهم إن العقل يفضل صاحي
عشان الأمر ما ينتهيش بانهيار عصبي
سؤال تاني
هل البنات دي ( اللي بتحب يعني ) سعداء بجد ؟
آه .. سعاجة وقتية
بتنتهي بسرعة
حب مؤقت نتائجه مش معروفة
دة غير طبعا إنه حرام في حرام
زي اللي بيشرب خمرة
هو مبسوووووط ومتكيف
بس شوية وهيحس بمشاكل الخمرة دي
دة غير الاثم اللي بياخده
ولو افترضنا ان الحكاية كملت بجد
( ما بني على باااطل فهو باااطل )الحب العفيف له أصوله
ولا يتضمن الهدايا وكلام الحب قبل الارتباط الرسمي طبعا
الرومانسية مش عيب
لكن الانغراق في الرومانسية الحالمة
دة اللي غلط
ليا كلام تاني بس شكل الموضوع عايز بوست لوحده
:)
والله يابتى كلامك زي ماتقولى كده خبط فيا
انا برضه سمعت حكايات وشفت حاجات حصلت ادامي
مبقتش عارفه القاعدة فين
بس عرفت في الاخر ان الحب الحاجه الوحيدة اللى ملهاش قاعده
يعنى مش هتلاقي حد شبه التانى في الموضوع ده
بس القاعدة بقى
ان الحياة بقت صعببببببببببة لاقصى درجة
ياللا انا شكلى اندمجت :)
خير خير
ربنا يكرمك يا جميل البوست حلو اوي
رداً على كلام ويسبر بقى:)
كلامك مظبوط يا ويسبر
مش لازم القلب يتحكم
وبرضه مش لازم العقل يتحكم بقدر كبير
لما حاجه فيهم بتضغى على التانية بتبقى النتيجة وحشه
انا شايفه ان لما العقل يبقى ماسك زمام الامور بيبقى احسن
بس القلب مايتعدمش
وانا معاكي ياويسبر ان الرومانية الحالمة مبقتش تنفع
مستنيه بقى البوست بتاعك:d
د.ويسبر كلام مظبوط طبعاً
:D
بس الفكرة دلوقتي زي مانقشتها قبل كده
بقت أساساً في القيود الإجتماعية والحياتية اللي فرضت على الجيل ده لدرجة إن الزواج والحب العفيف والإرتباط دي كلها
تعتبر pinky dreams
دور عليها لما تخلص جيش ولما تدور زي الحيوان في الطاحونة وتجيب فلوس وتبقى جاهز ...
انا فعلا بتكلم في واجهتين
واجهة ويسبر اللي هيه الاحلام الكاذبة والبنات اللي بتحب بطريقة غريبة والشباب اللي بلعب او بعيش قصة حب وممكن في الاخر يختمها بزواج اتوقع انه حيفشل ..
الناحية دي متفقين عليها
الواجهة التانية اللي هيه احنا كلنا حسينها
بنات بتحب وشباب بحب وعاوزينه في الحلال بس مش عارفين
اللي بحب بصمت حاسس انه ارتكب جريمة
واللي مش عارفة تعبر عن مشاعرها خايفة تعمل حاجة غلط !!
ومعنى الحب ضايع في النص من كتر الصعوبات اللي بتواجهه
هوه انا مش سألت خالص حكاية سؤال انا بحب ولا حفضل كدة يا وسبورتي !!
انتي عارفة ان بتيجي فرص
بس زي ما قلتي
العقل بيحكم فعلا
ومع ذلك اجمل احلام بتبقى احلامي لما ابقى مع صحابي بنبص للنجوم ونعد نتكلم عن الحب وفارس الاحلام بطريقة مضحكة وندحك اوي ونجيب سيرة الحب وسنينه ..
بحس في كدة متعة اساسا :)
مع ان الاحلام دي بتتحطم في جدار الواقع
بس زي ما بتقولوا لنا الله :)
ممممممم
جايز عندك حق يا دكتور عمرو
وانه فعلا الصح بقى مستحيل
بس برضه هذا لا يمنع أنه لا يصح إلا الصحيح
وإنه مش معنى إنه القيود الاجتماعية عاملة علينا حظر تجول
نقوم نسلك الطريق الأسهل وهو الطريق اللي مش صحيح
هنا بقى يبقى الصبر هو الحل
وربنا بقى هو اللي عالم بالحال
وهو اللي يعدل الامور
وبعدين سيبوها على ربنا
يعني الواحد يظبط اموره ويسعى
وبعد كدة يسيبها على ربنا
العبد في التفكير والرب في التدبير
ولا انتوا واخدين ( لنا الله ) دة شعار وخلاص :D
لا مش شعار وخلاص
بس أنا كنت عاوز أوضح إن الحق والصح بقى صعب والغلط والهلس بقى سهل
بس مش مبرر طبعاً
وأخيراً
لنا الله
:D
انا لقيت الموضوع طويل قولى بصراحة كنت هنفض اقراه
بس دخلت فيه لقيت اسلوبه ماشاء الله يخلى الواحد لازم يكمله للأخر:)
ما علينا ...
هو كل واحد يحب زى ما هو عايز
دى مفيهاش حاجة
ومش حرام ولا عيب
طالما الموضوع مقيد بقيود الأخلاق الإسلامية وماشيين بما يرضي الله
هنلاقى بقى قصص ناجحة وقصص فاشلة
دا طبيعي فى اى شركة بين اتنين
لكن هنا رأس مالهم هو مشاعرهم فهي إللى هتتأثر بالنجاح و الفشل
نيجي بقى للي بيتسلى (وإللى بتتسلى ) حسبي الله ونعم الوكيل فيهم بجد واكيد لو مش هيتوبوا يبقى عقابهم فظيع عند ربنا إن شاء الله
انا بحتقرهم بصراحة
وبحتقر أكتر إللى بتفاخر وإللى بتتفاخر بدة !!
موضوع مهم
واهم حاجة كل واحد وواحدة ياخدوا بالهم بس من البداية وعلى طول الطريق طبعا :)
وجزاكى الله عنا خيرا اختى فلونا :)
مافيش احسن من انك تفضلي قاعدة مستنية الكابتن
:d
بلا بطيخ بقى بلا انى اقعج اشوف كاباتن تانيين مزيفين -_-
و ابقى انا في الاخر الي رايحة للكابتن بتاعي مزيفة :(
خلينا كده اما نشوف اخترها ايه :d
المواضيع دي قلبت معايا في الاخر انها بقت بتضحكني اوى :d
احلى حاجة يا سمسمة اني لقيتك معايا :)
شكلك بتعاني زيي :)
اخ مانجر ربنا يكرمك يارب الفكرة هنا ان الحياة بقت صعبة فعلا
والواحد مش عارف يعمل ايه ويروح فين بمشاعره
حتى الحلال فيها مبقيناش نعرف نوصله للاسف
والحرام موجود في كل حتة والواحد بصبر نفسه
بس بايه
مش عارف
المجاهدة :D الكابتن الماتش بتاعه طول اوي :D
لا بس بجد احسن حاجة ان الواحدة تفضل مستنية الكابتن بتاعها
المشكلة بقى ان لا الكابتن عارف يوصل لينا ولا احنا عارفين ندله على الطريق :D
يا شيخة ده الماتش طول و السكة زحمة و يييييييي دنيا تانية هنااك خالص :d
في مرة بتكلم مع واحدة صاحبتي على الحكاية دي... ف بتقولي هوا ليه اتأخر كده؟؟؟ على نصيبها يعني
بقولها معلش تلاقي السكة زحمة عندهم
ف قعدت تدعي ربنا انه الطريق يبقى سالك
بعديها بمافيش اسبوعين تقريباً كانت قراية فاتحتها :d
عشان تعرفوا ان السكة زحمة مش بمزاجه :d
طب اللى برا حاجه
ومن جوا بوست تانى لواحده ...
ممممممممممممممممممممممممممممم
بصى ...هوا كده كده هيجيى ان شاء الله ...
خليكى قاعده فى بيتكوا...على الكنبه ..
وحاطه رجل على رجل ...
بس بلاش تتأمرى...عشان بيقولك راجل واحد ل8 ستات
النسبة قلت مووز فى مصر
وكمان ايه اعلان ريكسونا اللى فى الاخر بتاع قشرة الموز :D
مجاهدة هههههههههههههه
البنت دي دعوتها مباركة
يارب يسلك السكة لينا جميعا يارب وتتحل ازمة المواصلات في مصر ياااااارب :D
سفاح كرموز :D
انا مش مستعجلة عليه
بس بجد حاجة تدحك
ممكن يبقوا اتنين بحبوا في بعض حب صامت
خوفا من المصير المجهول
واتنين تانيين مقضيينها في شوارع مصر
ولا هاممهم حد ..
الصح بقى مش صح والغلط بقى شكله صح وحاجة كدة كلها غلط في صح :D
الحب فعلا بقى بهدلة انا اعدة اكلم الناس واقولهم بجد بجد الحب بهدلة !!
ربنا يكرم الجميع بجد
بقولك الموضوع ده بيقلب معايا بضحك
انا لو فضلت في الموضوع بتاعك ده شوية هقلب تهييس قوى مش وقته :lol:
بس بجد بجد... اقولك حاجة قلتها زماان لواحده صاحبتي
الناس كلها نفسها في حاجة.. و انا نفسي في حاجة
الناس كلها بتمشى في طريق غريب عشان توصل للحكاية دي
يعني البنت تروحج تدلع على ولد شوية... او تقول لصاحبتها تقوله... او تقول لصاحبه يقوله.. او تروح هيا نفسها تقوله
و الولد الي هيا معجبه فيه في الاخر يبصلها
يفضلوا مع بعضة كام شهر
قةولي اخرهم كام سنة
من غير بركة ربنا ولا رضاه
انا الي عاوزاه هوا هوا نفسه... بس بطريقة اسمى
مش بروح لاي حد غير لربنا
مش بعمل اي حاجة تغضب ربنا
و ربنا بيجيب للناس دي الي هما عاوزينه
يبقى مش هيجيبلي انا اللي انا عاوزاه!!
:)
هيجي طبعاً :)
و ادينا مستنين :d
الموضوع جامد :D
لسه من كام يوم بكلم واحد صاحبي من أمريكا عنده حوالي 19 سنة لسه في تانية بيدرس
Computer Science
المهم كان بياخد رأيي في الخاتم إللي حيجيبه لخطيبته إللي كلها شهرين تلاتة و يتجوزها
و بيقولي إنت مش ناوي تتجوز بقه ولا إيه :D
فاكر إن الموضوع سهل عندنا
قولتله طبعا لسه بدري ياعم مش لما أتخرج الأول حتى قالي هو إنتوا معندكمش small wedding في مصر ؟؟ قلتله لأ!
بره في أمريكا أسهل حاجة الجواز مفيهوش التعقيدات دي كلها إللي موجودة في مصر المجتمع هناك أبسط من هنا بكتيـــــــــر
علشان كده بتلاقي إن معظم إللي بيتجوزوا بيكون الزوج أكبر بما لا يقل عن 5 سنين
و ده لما يكون الموضوع متسهلة كمان ده دلوقتي ممكن تلاقي تمن و تسع و عشر سنين
أما جواز إللي في نفس السن فنادر جدا
إلا في حالات إستثنائية :(
و أنا شفت حالات من دي بنفسي
أنا مبحبش أسود الدنيا بالعكس أنا بكره جدا إن حد يسودها و يصعب الأمور
بس هيا مش وردي قوي برضه
يعني مش أول ماولد يعجب ببنت يروح يقولها على طول و يعيط بقه و يقول عايز أخطبها و هو لا معاه فلوس ولا شقة ولا عمره إشتغل و لا لسه إتخرج حتى!
فالموضوع عاوز شوية عقل مع الحب فمتقتلش قلبك و تخلي العقل يتحلكم كليا ولا تسيب القلب يتحكم في كل حاجة و إنت واقف بتتفرج
إللي عايز يحب بجد و يتجوز إللي بيحبها حيوصل لو ما إستسلمش للظروف يعني هو صحيح لنا الله لكن متقولش كده و تستسلم
هو كده المجتمع بتاعنا حنعمل فيه إيه بقه ...
معاك حق الواحد المفروض يعقلها ويتوكل
المجتمع نفسه فرض علينا تعقيدات كتير متعبة
دلوقتي اي بنوتة تقول لمامتها انا بحب زميلي مثلا او ييجي زميلها يتقملها
الام ترفض قطعيا
الكلمة الشهير من غير ما حد يزعل
انتي جايبالي عيل !!
سبحان الله
رب رجال كبار في السن عقولهم بتبقى صغيرة اوي
وساعات بيبقى طالب وعقله يوزن بلد
الاهل مساعدين في التعقيدات دي من غير قصدهم
هم نفسهم يجوزوا بناتهم احسن جوازة وخلاص
وكلام الناس والبطيخ ده
!!!
هوه الواحد المفروض اول ما قلبه يشتغل
يشغل عقله علطول في ساعتها
عشان لو حس ان الامور ممكن متمشيش
ينسحب بهدوء قبل ما القلب يتجرح
مش عارف
في اراء كتير عجبتني هنا خوصا راي اسامه لما كان بيقول
"للي عايز يحب بجد و يتجوز إللي بيحبها حيوصل لو ما إستسلمش للظروف يعني هو صحيح لنا الله لكن متقولش كده و تستسلم)
الكلام ده مزبوط بس ساعات حتي الشاب لما بييجي ياخد خطوة بتبقي مشيته بطيئة جدا
او بمعني اصح لسه والا حاجة وادامه سنييييين عشان يقدر يكمل نفسه
او حتي الظروف مش مساعداه انه يتغلب علي الظروف :D
بجد والله
انا عاوز اقول برده اني معترض علي اسلوب الموضوع لان ممكن يكون فيها شئ ولو بسيط من السخرية من معني الحب في حين انه من اسمي المعاني اللي ربنا خلقها
بالنسبة بقي لمضووع القلب والعقل
علي فكرة موضوع التحكم والانسحاب والكلام ده مش سهل خالص
مش سهل ابدا
حاجة زي ادمان الهيروين كده صعب جدا تتخلص منه
الكلام ده من واقع تجارب كتير لصحابي :D
بجد والله :D
فعلا يا جماعة الموضوع صعب جدا اللي عنده حل لمعالجة الادمان يقوله بقي خصوصا اذا كان الانسان متمسك بالهيروين جدا
ولو رجعنا لكلمة الحب حنلاقيها كلمة طاهرة
لكن اللي بيحصل في مجتماعتنا دلوقتي شوهوا معناها
قصص حب وحوارات وارتباطات بعيدة عن الدين وبعيدة عن الاسلام
شباب بحب ومش عارف يتجوز مشاعره مكبوتة ومش عارف يقولها لمين
بنات مستنية فارس الاحلام ومستنية ومستنية
والباب ساكت ما بخبطش !!
وتضيع احلامها وسط زحمة الحياة
(انا والله كتبت الكلمة دي عشان اللي بيقرا يفهم اني مش بعترض على معنى الحب (
اعتراضي كله على اللي بيحصل تحت كلمة الحب
سواء من الناس نفيسها
او من عادات وتقاليد مجتمعاتنا اللي قيدتنا بضوابط من التزامات الشاب مش قادر عليها !!!
بس ايه حكاية الادمان والهيروين :d :d
هيه الحكاية مش سهلة
ممكن نقول ساعتها ان العقل يسبق القلب
تعقلها جواك الاول ان البنوتة دي مناسبة
وبعدين تسمح لقلبك يحبها !!
ده كلام مع نفسي مش مقياس يعني :D
جزاك الله خيرا على المرور
انتى هتخلى الواحد يجيله فراغ عاطفى كدا
ايه دا
بس عارفة اللى بيدور على الحب دايما بيفشل فى الاخر
فى جملة حلوة اوى اوى اوى لاحلام مستغانمى
(اجمل حب هو الذى تعثر عليه عند بحثك عن شىء اخر)
وادينا مستنيين
:(
"الحب فعلا بقى بهدلة انا اعدة اكلم الناس واقولهم بجد بجد الحب بهدلة !!"
كلامك غلط من ناحية
ان الحب شحورة ...والجواز زمهرة ..هع هعهع
بمعنى هنحب خهنتبهدل...وهنتشحور...هدايا وبتاع ...وتجهيز...هنتنيل...سورى هنتجوز...يبقى مصاريف ومسئولية وعيال بأمهم...وحماتى ...
عك فى عك
نظرة تفاؤليه من داخل السفاح :D
هو يا ترى
في حد فيهم بيسأل نفسه ده حلال و لا حرام
و لا بيقولوا عليه رجعي و متخلف ؟؟
أختى الكريمة
الموضوع ده موضوع حساس جدا ومؤلم للغاية
موضوع مشاعر وأحاسيس
بمجرد الإستهزاء بيها ممكن يؤدى الى الموت حتما
بس انت عارف
انا مش أقدر أحكم فى موضوع زى ده
لأن فاقد الشىء لا يعطيه
ومش معقولة اكون اان فى مشكله و أروح أحل نفس المشكله لواحد تانى
السلام عليكم
اعتقد يا علاء ان الموضوع بالاساس بيتكلم عن المشاعر نفسها ليس عن التصرفات الى بتتستر باسم الحب
انا واخده اخواتى قدوه فى الموضوع ده
يعنى
كلهم اتجوزوا جواز تقليدى
ييجى اسمه ايه ويخبط على الباب نطلع بعلبه الجاتو
يقعدوا مع بعض شويه
موافقه ؟ مش موافقه
نمشى فى اجراءات الجواز
يجوزوا ويعيشوا فى تبات ونبات ويجيبوا بنات
( يارب ييجى الواد بقى
بس
تبدأ قصه الحب من الطريق الصح
يعنى دايما بيقولوا الحب نهايته الجواز
لا احنا عندنا الجواز بدايه الحب
بس
والله الموضوع ده كويس
يعنى ولا نتعب نفسيتنا ولا الكلام ده خالث
يعنى دايما مبدأى ان الحب هو اللى ييجى للانسان مش الانسان اللى يدور ع الحب
بس كده
قلبتي عليا المواجع والله
ده الواحد ما كان صدق نسي موضوع الجواز بقى
حضرتك اتكلمتي عن الحب من نواحي كتير بس يمكن ركزتي أكتر على الناحيه الإجتماعيه و دي حاجه أحييكي عليها
الناحيه الدينيه مهمه أوي بس أما الواحد يعرف إنه مش بس هيعصي ربنا , ده كمان فالآخر هيخسر هيخسر بأي طريقه وممكن يتعقد :S
:D هنعمل ايه بس إحنا الشباب مظلومين
ليا تعليق بس على كلام عمرو
يا عم عمرو انت ملكش دعوه بالجيش والكلام ده إنت امتياز ميكرو و اتوكل على ربنا علطوول
شكرا ليكي يا دكتوره على طرح الموضوع و على أرائك اللي أفادتني كثيرا
والسلام عليكم
والله اجمل بوست قرأته هنا لانك بتكتبي التعريف الصح للحب بعيدا عن الكلام المعتاد اللي بنقرأه في كل مكان...الكلام اللي من نوعية اسامة منير كدا ...بجد بوست جمييييييييل جدا
=============================
وعلى فكرة انصحك يعني...لو جالك الحب من الباب..اطلعي من الشباك :D:D:D:D:D
to whisper
انا كنت هكتب نفس ردك على فكرة ...فياريت تعملوا كوبي باست على كلامها
مش عارف كلامك متناقض مش فاهم منك حاجة شكلك كده والله اعلم انك خارجه من قصة حب فاشلة ان حاسس كده بس كويس انك بتحولى تتجاوزى الموضوع بكلامك ده ومع السلامه
ماعتقدش ان اخر رد ده ليه لازمة
احسن حاجة الناس الضعيفة بتاخاف ترد باسمها
خيرا :)
:)
خيرا اهو الناس بتعبر عن رايها برضه
بس انا ذكرت في البوست اعتقد اني مليش في الحوارات دي وكتبت المعاناة كاملة وكانت جملي واضحة
ممممممم
يبقى حضرتك مقرتش البوست اصلا :D
قصة حب فاشلة ؟
لا حضرتك احنا مش بتوع قصص الحب الفاشلة
وياريت حضرتك يا فندم المرة الجاية تبقى تكتب اسمك
عشان بس لما نيجي نرد نلاقي اسم نكلم حضرتك بيه
وبعدين كون حضرتك ما فهمتش حاجة من البوست
والناس دي كلها فهمت
يبقى أكيييييد الغلط مش في البوست
و عموما أهلا وسهلا بحضرتك في أي وقت
بس ياريت تكتب اسمك
بوست كويس فعلا
وبتناقشى فيه حاجات كتير بتحصل فى الواقع
بالنسبه بقى للحب فاحنا مش لازم ندور عليه
لو من نصيبنا يبقى هييجى لوحده
وربنا يكرمنا جميعا
مش عارفة مش بحس إن الحب بتاع الكافيتيريا وكوبري الجامعة ده حب
وكل القصص من النماذج دي حتماً ولا بد تنتهي بفشل ذريع لأنها بدأت غلط ومشيت غلط
بحس بجد إن الشباب بيضحكوا على نفسهم بوقت ظريف ولطيف وينصدموا في النهاية
كلنا في داخلنا مشاعر قوية جداً ، تزداد قوتها في القلوب النقية التي تخشى الله وتتجنب فعل ما يغضبه
أصحاب القلوب اللي زي دي لما يحبوا يحبوا بجد .. حتى لو كان وصولهم للطريق الطبيعي للحب شبه مستحيل
أصحاب هذه القلوب لما يحبوا بيخافوا على اللي بيحبوهم أكثر من أغلى حاجة عندهم في الوجود .. خوفهم ده ممكن يدفعهم للتضحية بكل حاجة متمسكين بيها
في هذه الحالة فقط يكون الألم مستعذب .. لأن الألم لغاية نبيلة ، ولأن الألم لوجه الله
يبقى التساؤل هل للعقل سيطرة ؟
العقل له سلطان في التوجيه وليس الشعور .. يعني العقل هو اللي بيخلي الإنسان يسمح للشعور بالنمو أو يوقفه عند حده ، وهو اللي بيحكم التصرفات النابعة عن الحب ولكن لا يستطيع منعها
ليس لأحد منا قدرة على منع الشعور ، لكن له القدرة على تحجيمه وتقنينه وربما تناسيه
الحب الحب . . الشوق الشوق . . مشتاق مشتاق . . حاللو يا حاللو
(حبيت ابتديها هزار شويه )
انا مش عارف هبدأ اتكلم منين و لذلك هتكلم و خلاص
. . حب الكافيتريات و الكورنيش و ما شابه . .
الحب ممكن ينتج عنه . .نظره . . ابتسامه . . انما موضوع يمسك ايديها و يتمشى بيها على الكورنيش . . ده حاجه من الاتنين
1 . الواد ده ما بيحبهاش و هو بيستهبل . . لانه لو بيحبها ما يرضالهاش نظرة الناس لما يكون ماسك ايديها و بيتفسح معاها
لان اللي بيحب لازم يحترم الشخص اللي بيحبه و يحافظ على كرامته
2 . الواد مش فاهم . . الاعلبام المريض نقلله صورة مشوهه للحب
. . الحب بهدله . .
اه طبعاً . . الحب بهدله . . الحب ده زي ما تكون متعور تعويره كده . . المشكله كده ان في ناس لما تبقى متعوره . . تقعد تفص في التعويره . . طب ماهي هتوجعك . . طب مانا عارف . .
سيب التعويره ما تلعبش فيها
. . التحكم . .
هنا تكمن المشكله . . المشكله انك تمسك الموضوع في اوله . . لان لو سبته هيتعبك فعلاً
. .الطريق السليم . .
انك تتجوز . . و طبعاً ده بقى زي طائر العنقاء اذا كنت في العشرينات من عمرك الضائع
كفايه كده النهارده
الحاجات ديه كلها موجوده يا فلونا .. بس ده مش معناه ان الكل كده
انا كمان سمعت 100 قصه فاشلة .. بس سمعت 10 ناجحين .. فيه طبعا فرق كبير في النسب
بس اهدي يا فلونا متعمليش في نفسك كده يا بنتي :D
اسلوب رااااااائع
بالذات إرفاق الصور المعبره
انا هقول جمله صغيره
الحب = الزواج
الزواج = الحب
لا يسبق الزواج ..حب يتعدى مجرد شعور
مدونه رقيقه
:)
دى اول مره ادخل البلوج
بصراحه انا كنت بضور على حاجه وشدنى موضعك لحد ما قراته كله بجد بوست هايل جدا ومعبر اوى وبتكلم عن حاجه اكيدمفيش حد مش بيفكرفيها بس الكلام واقعى جدا جدا بالذات اللى بيحصل فى الكليه والمدرج
والصور كمان جميله عامله للبوست شكب حميل جدا
ويا ريت مكنش تألت عليكى
dark :
gamed awe ya banat
all i can say that
love worth every thing we do
bas fe 7dod el masmo7 beh fe dena
nice one we pics gamda fa7t :D
الظاهر الحب فعلا عاملنا كلنا مشكلة
بس بجد اللي قدرنا نوصل ليه كلنا
ان الحب الطاهر العفيف يستحق نصبر لحد لما يجيلنا
ونعيش حياة حلوة اوي تحت مظلته :)
دي مش قصص حب ده اعلان ايركسونه
اولا انا برد و انا خارج لسه داخل في ازمه لاني فشلت مع اول و اخر بنت اصرحها في حياتي لان الدنيا انقلبت رائسا علي عقب و انا ايضا اشعر ان حياتي تسلب و لا استطيع الابداع ما دمت لا اشعر باني احب احد و هو يبادلني نفس الشعور يعني ه احكي موقف كنت في المركز البريطاني في الكورس بتاعي و سالت المدرسه بتاعت الكورس رتبوا الحجات ديه حسب الاولويه عندك و المعطيات كانت(ترتبط_تجمع فلوس_تحقق نجاح_تحقق شهرة)فكان ترتيب الاغلبيه فلوس نجاح شهرة و اخيرا ارتباطو كان انا الوحيد المختلف في الترتيب رغم اني كنت الاصغر انا في تانيه جامعه و كلهم متخرجين و بيشتغلوا كان ترتيبي هو(ارتباط علشان تشاركني نجاحي و ما دامت بتحبني يبقى الرزق بايد ربنا و الشهرة تيجي او ما تجيش مش فارقه)استغربت المدرسه و سالتني عندك كام سنه و ضحكت بس اعتقد ان ده رد بسيط علي هو ايه الحب مشاركه مسنده صبر حنان و رفق و طيبه و اولا و اخيرا شعور بالاخر و المه قبل ان يشعر به
اللهو الخفي :)
هههههههههه دحكتني اوي حكاية انك ترتبط الاول سبحان الله كل واحد عنده اولوياته
بس معقولة انت الوحيد اللي كدة ؟؟
ياااه ده الناس بقى مبقتش عارفة تحب :) :)
Post a Comment