Friday, March 30, 2007

يا عم دي بلدهم


بقولوا دستورنا حيتغير
وبلدنا في اثره حتتطور
حرية ورفعة وكرامة
والدنيا ما بعده حتنور
بقولوا حنبقى بلد احرار
مش اسلامية ولا مسيحية
دي حاجة كدة ملهاش قرار
حننام في بيتونا بأمان
وماحدش ليه علينا كلام
حنروح المسجد ونصلي
ونعمل مظاهرات ونغني
لا للظلم لا للعدوان
احنا بلد حر وكله امان
ما كتب فوق مجرد كلام تهييس خارج من قلب مواطن مقهور
من اول التعديلات على التصويت على الشجب والانكار مننا على اخر كلام سمعته
كله حاجة كدة ملهاش تعليق
غير تعليق واحد بس
يا عم دي بلدهم يعملوا فيها اللي هم عايزينه
خلاص ميقتش بلدنا بقى
تفتكروا جزر القمر ممكن توافق اروح اعيش عندهم
حق لجوء سياسي طيب
؟؟؟؟؟

7 comments:

WhiSpeR said...

على فكرة احنا ما نتكلمش في السياسة
لا حد يفتكر حاجة يعني
دي مقالة برييييييييييييييئة
:D

خطــاب said...

انا فكرت نفس التفكير

الهرووووب الكبير

safa7_karmooz said...

!!!!!!!!!!!!!!!!!!!!!!!!!!!!!
ايه يا جماعه ...تعديلات واتعملت ...عادى ...

يعنى كل اللى مزعل الناس انها اتعملت ...انا شايف الوضع زى ما هو اصلا...لان كل اللى حصل الحاجات اللى كانت بتتعمل وبتخالف القوانين والدستور...اضافوا عليها الصبغه القانونية ...ليس الا

يعنى الحال كما هو عليه ...لم يحدث جديد...

وبالنسبة لاغلب الناس اللى بتقول انها مبقتش بلدنا ....ولا حتى دى بلدهم...بس اللى صح انها بتاعتنا

واحنا اللى المفروض نحافظ عليها

بس طالما الشعب ماشى بمبد~أ اكلى موجود ...والعيال مستورين وامهم ...ماليش دعوة...

هيجى وقت لازم الطوفان هيطلع من تحت الارض ...

وحتى يأتى هذا الوقت ما ينفعش نييأس ولا حتى نروح لبوجبوجا نطلب اللجوء السياسى

لازم نقعد ونحاول نغير اللى شايفينه غلط

والا فعلا ما نستحقش يتقال علينا مصريين او حتى نقول البلد دى بتاعتنا

:)

WhiSpeR said...

ماهو دي المشكلة
إنهم أضافوا الصبغة القانونية
يعني زمان كانوا بيغلطوا وبنقول عليهم غلطانين
دلوقتي حتى ما نقدرش نقول انهم غلطانين
لأن كل اللي بيعملوه بقى تنفيذ للقانون
يعني منتهى الديموقراطية
ودي في حد ذاتها حاجة تحرق الدم أصلا
بس هما فعلا فاكرين إن البلد بتاعتهم
العزبة بتاعة جدودهم
يبيعوا ويشتروا فيها زي ما هما عايزين
أما الشعب
فياعيني على الشعب
غلبان والله
بس نرجع ونقول برضه (من أعمالكم سلط عليكم )
:(

§a§a said...

التعديلات كدا كدا كانت هتتم

سواء برفض الشعب او بموافقتهم


دى خلطه سحريه من جزب الاغلبية

مش عارف فين حزب الاغلبيه

اللى بدون شعبيه

شعبيته تكمن فىالتزوير


يلا اهو انا كمان بقالى سنه بحاول اهاجر عن البلد دى

حتى الهجرة بقت صعبه


نشوف موريتانيا

اهى ممكن اهاجر لها

فيها نزاهه وكل شىء

والرحمه على مصر

WhiSpeR said...

بزعل أوي وأنا بقول الكلام دة
وبزعل كمان لما بسمعه
بس فعلا الناس بقت شايفة إن الهجرة هي الحل الأمثل
قد لا تكون فعلا الحل الأمثل
بس هي الحل الوحيد القابل للتحقيق
وربنا يعين
وحسبنا الله ونعم الوكيل في حزب الأغلبية
كنا زعلانين من قانون الطوارئ
حطولنا الألعن منه
:(

كش ملك said...

انا كتبت قبل كدة موضوع فى البلوج كش ملك ان فى حوار حصل بينى وبين والدى فى موضوع الهجرة قبل تعديل الدستور بكام يوم .. المهم كان نهاية الحوار الرفض التام لأن من وجهه نظرى الهروب ليس افضل وسيلة للنجاة بل المواجهه افضل وسيلة ..