Wednesday, November 21, 2007

كــلام م الــقــلــب

اضغط على الصورة للتكبير
نظرا لأنه طبعا زي ما اتفقنا أنا واحدة مشغولة جدا
فأنا عملت تصميم تاني عشان الأولاني مش عاجبني
:D
جميع الحقوق محفوظة
يعني أنا اللي عملاه :D



دة نوع من الفضا .. من كتر المذاكرة اللي عندي سيبتها وكتبت الخاطرة دي
والأهم من كدة التصميم ..ز أنا اللي عملاه
مبسوطة أنا أوي اني سايبة المذاكرة وقاعدة بعمل في تصميمات وأكتبلها خواطر
:D

حروف تتلم
وتتجمع وتتشبك
عشان تنسج
كلام م القلب
يقيد شمعة
ويزرعها ما بين كل حرف حرف
كلام عنك
كلام عني
كلام عنا
كلام عن فرحة تجمعنا



حروف اسمك
حروف اسمي
وكل حرف فيه يحكي
عن الجنة
واحلامك واحلامي ... وأحلامنا
ورسمة قلب
على شجرة .. وفيه السهم
وفراشة حب
وريحة الورد



صور قدمت
صور لينا
وصور ليا
صور بحر كنا بنرمي فيه همومنا
وعلى شطّه كتبنا الحب بحروفنا
وبالرملة بنينا بيت يجمعّنا
صور لينا ولاصحابنا
لاغلى الناس وأحبابنا



وكلام م القلب
كلام عن أحلى أيامنا
وفي الأخر لقيت صورة
وأنا لوحدي
حزينة كتير ومكسورة
ورسمة قلب
على شجرة ومفيش السهم
ولا حرفي ولا حرفك
خلاص ماتت فراشة الحب



وصورتي قاعدة بستنى
رجوعك ليا بتمنى
تاخدني تاني للجنة
ومن حبك تسمعني
كلام م القلب

30 comments:

Unknown said...

الله على الفيتو :D

على فكرة فيها موسيقى حلوة تحسي انها ممكن تتغنى أو حاجة

التصميم حلو بس تحسي الصور مش على نفس مستوى الكتاب

يعني كانت عاوزة ميل أكتر أو حاجة

تحياتي للفولاتيل أويل

heart of ocean said...

يا مساء الاكتـئاب يا ويسبر .. اضم صوتى لصوت الاكتئـــاب .. :D

حلوه يا ويسبر .. فاضيه يا حلوه .. امال فين الدروس اللى عندك ؟؟

بس بجد حلوه :)

انتى بتذاكر ماده ايه عشان كل ده ؟:D

sammo7 said...

برافو برافو عليكي ، ما شاء الله
الكلام جميل جدا جدا جدا
ربنا يكرمك
بجد فيه معاني في منتهى الجمال

حافظي على المستى الجامد ده في كتاباتك وهيبقى ليكي مستقبل رائع كمؤلفة ، ده غير طبعا الصيدلة
هو إحنا هنتبرى من أصلنا وللا إيه
keep forward
ya doctor

sammo7 said...

قبل ما أنسى البلوج شكله كدة متأثر بماتش الأهلي الأخراني

عاش الأهلي عاش

شكله جميل اوي البلوج مع شعارات الأهلي وشغل الأحمر الطاغي عليه

شغل جامد جدا

وعاش الأهلي فوق الجميع

death knight said...

جامده مووووووووووووووووووووووووووووت
بجد فازيعه و عجباني اوي

و معبره جدا

بجد ليكي مستقبل

WhiSpeR said...

دكتور عمرو
تصدق حضرتك ان بقالك كتيييييير ما علقتش
آه والله
... يااااه ... دنيا
لا وحضرتك اتعديت ... التصميم حلو وبعد كدة ندخل على النقد
هو فعلا أنا لاحظت ان الصور كان المفروض تتميل أكتر
بس أنا استعجلت بس هظبطها ان شاء الله
الفولاتايل اويل بتسلم على حضرتك أوي أوي
وبتقولك زوروني كل سنة مرة .. حرام تنسوني بالمرة ... عشان هي جاية تزورنا قريب
:D

WhiSpeR said...

heart of ocean
انها الفايتو يا عزيزتي
الابداع كله بييجي مع الفايتو
الفولاتايل اويل بتنشر روائح عطرية في المكان
تهيج مواقع الابداع في المخ
فأبدع في الكتابة وأنسى الفايتو
والدروس بتسلم عليكي عالآخر
بجد حاجة فظيعة الدروس دي
اختراع باااااارد
:(

WhiSpeR said...

@ dr.sammo7
ميرسي يا دوك
أنا لو حافظت على المستوى دة يبقى أبطل أحسن :D
هي عامة خاطرة لا ترتقي لمستوى الشعر
يعني ما ركزتش فيها أوي زي اللي قبلها فطلعت خاطرة فيها نوع من السجع بس مش شعر
شكرا على مرورك ومبروك مدونتك
والأهلي هو الأهلي
:D
والكبير كبير

WhiSpeR said...

@ dr.death night
شكرا على مرورك
ويارب يبقى ليا مستقبل في صيدلة الأول
:D

محمد said...

ما شاء الله
:)

تصميمات وأشعار


خير .. خير

توكلي على الله وحولي فنون جميلة أو فنون تطبيقية

بالمناسبة .. ليكي قريب بيلعب في الأهلي ؟؟

يعني تعلقك بيه غريب ؟؟

WhiSpeR said...

أخ وضاح
دائما منورنا في البلوج
انا كنت اتمنى ابقى في فنون جميلة فعلا
بس قدري اوصلني الى صيدلة

بالنسبة للأهلي بقى
أنا ماليش حد بيلعب في الأهلي ولا حاجة
ولا ليا قرايب في الكورة كلها خالص
وعيلتي مالهمش في الكورة خالص ما عدا أخويا الكبير أهلاوي برضه
بس أنا أكتر واحدة بعرف في الكورة أو تحديدا في الأهلي
ليه بقى ؟
والله ما أعرف
بس الحكاية بدأت من بعد الأمم الافريقية اللي فازت بيها مصر
يعني بعد نزولي مصر بتيرم واحد
لقيت نفسي بشجع الأهلي
عادي يعني مجرد انتماء رياضي يعبر عن فراغ الانتماء في الشباب
نظرا لأنه الأهلي بيكسب وبيحقق انتصارات وما إلى ذلك تحسس الواحد انه في حاجة بتحقق انتصارات
لأنه مصر ما شاء الله بطلت انتصارات من سنة 73
أنا فعلا معرفش أنا بحب الأهلي ليه ولا بشجعه ليه ؟
ولو عرفت أوعد حضرتك اني أقولك
:D

محمد said...

تعرفي .. نفسي يكون لي انتماء كروي

مع إن أحد لاعبي الأهلي المتميزين تقدري تقولي قريبي

أحيانا بحاول أشغل نفسي بالكورة والأهلي والذي منه .. دائما تبوء محاولاتي بالفشل الذريع

صحيح .. ليه تشجيع المصلحة دا ؟؟

يعني لو الأهلي خسر هتشجعي الساحل الشمالي ولا إيه ؟؟
:)

WhiSpeR said...

لا ازااااااااااااااااي
طب ما الأهلي لسة خسران البطولة الأفريقية بحالها بطريقة درامية
بس أنا عارفة انهم حاولوا بجد وتعبوا بس اتظلموا
لو كنت بشجعه عشان بيكسب بس كنت شيلت شعار الأهلي اللي منور فوق دة بعد ماتش النجم الساحلي
بس دة لا يمكن أبدا
بس اللي اعرفه اني لو بطلت أشجع الأهلي هبطل أشجع كورة خالص
يعني يا الأهلي يا بلاها كورة
:D

علاء عارفين said...

أظن أنا قلتلك انها جامده ف مش محتاج اعلق تاني و خصوصاً الحته بتاعت

وصورتي قاعدة بستنى
رجوعك ليا بتمنى


جامده موووت

بس التصميم برضه مش عاجبني خااالص الصور باينه بعيد اوي عن الbackground

من حيث اللون و الbrightness

مع التاني احسن من الاول كتير بس برضه ممكن يكون احسن

محمد said...

مررت لأبلغكم
الأختين ويسبر وفلونا
بتمرير هذا التاج لكم


هنــا

Anonymous said...

اظاهر كاظم الساهر هيلاقي شغل جديد

بجد الكلمات حلوة جدا والصورة اجمل واجمل



بس في مشكلة: القلب الي في الصورة فيه سهم


ورسمة قلب
على شجرة ومفيش السهم
ولا حرفي ولا حرفك



بهزر بجد تحفة

WhiSpeR said...

أهلا وسهلا بحضرتك
بس مين حضرتك ؟
:D

بالنسبة للسهم فدي الشجرة في الأول
لما كان لسة فيه السهم
:)

catroz said...

وكلام م القلب
كلام عن أحلى أيامنا
وفي الأخر لقيت صورة
وأنا لوحدي
حزينة كتير ومكسورة
ورسمة قلب
على شجرة ومفيش السهم
ولا حرفي ولا حرفك
خلاص ماتت فراشة الحب

........

حلوة و حزييييييييييينه..

Anonymous said...

سبحان الله!!!!


اكيد لو عاوز تعرفوني ....


كنت كتبت

nick name
(;

WhiSpeR said...

خلاص براحتك حضرتك
هو مش اجباري
كل الموضوع هو ان مش عيب يعني ان الواحد يقول اسمه
على الأقل الناس تعرف تخاطبه بيه
يعني لما آجي أكلم حضرتك أكلمك باسمك أو حتى بنيك نيم
لكن مش عايز ... بلاش
دي حرية شخصية
و نحن لا نحجر على حريات الآخرين
:)

ســـارة said...

أليمة أوي يا ويسبر :(

بجد مؤلمة جداً

مش عارفة ليه حسيت بيها

بس خيراً .. ربنا كبير

Anonymous said...

طيب براحة انا اسف انا غلطان



:(

WhiSpeR said...

طيب براحة انا اسف انا غلطان



يا فندم حضرتك أنا ما قولتش انك غلطان
كل الموضوع اني سألتك حضرتك مين عشان أبقى عارفة بس أنا بكلم مين
لقيت حضرتك اللي اتكلمت بعصبة كأني سألت سؤال مش من حقي
وعامة نعتذر عن هذا العطل الفني
واهلا وسهلا بحضرتك في المدونة في اي وقت
رغم اني حتى الآن برضه ما عرفتش مين اللي بيتكلم
:)

دهاء سياسي said...

السلام عليكم و رحمة الله و بركاته

كل سنة و انت طيبة يا ويسبر

مبعوتلك تاج من عندى من هنا

http://3eeshella7za.blogspot.com/2007/12/blog-post_24.html

سلام :)

§a§a said...

جميل جدا البوست

بس حزين كتير

The Manager said...

بصراحة كنت ناوي انفض للتصاميم وادخل في المفيد (لأني مليش فيها للأسف ) بس لما تأملتها شوية لقيتها جميلة قوي احييكي عليها اولا يا ويسبر

الخاطرة بقي اجمل منها , بجد كلام يتحس على طول اول ما نقراه
وعلى الرغم من الحزن إللى بيكون دايما فى ذكرياتنا إلا إنه جميل وبيدينا امل فى الحياة , او بمعنى تانى حماس جديد فى استكمال مسيرة الحياة ... ولو ان الكلام دة كله من الخيال طبعا ومش شرط فى صور ولا حاجة :D لكن انا بتكلم عن الإحساس إللي جالي وانا بقرأ الخاطرة بتاعتك

انا متأخر قوي قوي طبعا فى التعليق معلش

امتحانات فى شهر نوفمبر !!
يارب ربنا يكون اكرمك فيها ويكرمك فى امتحانات يناير كمان

تحياتى ليكي و لفلونا

Abd-Alrahman said...
This comment has been removed by the author.
Abd-Alrahman said...

بصراحة التصميم يغني عن الكلام
جميل جدا ورومانسي حتي الكلمات موضوعة بطريقة جميلة
ومنتقاه ومنسقة بعناية
بوست جميل جدا اكتر من رائع

شكرا جزيلا علي المجهود الجميل
الذي استمتعت به في اول زيارة للمدونة

break said...

جميلة اوى تسلم ايدك

كل سنة وانتى طيبة بمناسبة الاجازة

WhiSpeR said...

دكتور اون لاين
ميرسي على ذوق حضرتك
واهلا وسهلا بحضرتك في المدونة
ويارب نشوفك هنا دايما


بريك
انتي فين من زمااااااااان ؟
ويلكم باك في المدونة بتاعتي
وياريت ما تختفيش كتير كدة تاني