Saturday, February 2, 2008

دقّـــــــــــــت....



دقّت قلوبنا المغرمة
دقّت ابواب السعادة
وكل فرحة محرّمة
دقّت ماليها حزنها
دقّت وجواها ألف آهة معلّمة
دقّت يا مين يفتحلها باب المحبة
دقّت وصوتها بيتخنق
يوم بتنده مين بيسمع ؟
يوم تدق وهي ساكتة
دقّت وبتعد الساعات
وكل ساعة بألف دقة
دقّت ونار الشوق بتحرق حبة حبة
دقّت وبس عايزة تفهم
هو ايه معنى المحبة ؟
دقّت وكل يوم تعيد في نفس الأسئلة
هو كاس الحب مر ؟
طب هو في بعد المرار دة أي لذة ؟
عادت وزادت في السؤال
بس الاجابة من المحال
دقّت قلوبنا بحزنها
يا مين بيسمع دقّها؟
يا مين يقرّب فرحها؟
دقّت يا مين يفتحلها باب المحبة؟

7 comments:

sammo7 said...

يا سلام عليكي ، كلامك جميل كالعادة
برافو برافو برافو

عجبني اوي لما قلتي :
دقّت ونار الشوق بتحرق حبة حبة
دقّت وبس عايزة تفهم
هو ايه معنى المحبة ؟

وكمان :
عادت وزادت في السؤال
بس الاجابة من المحال
دقّت قلوبنا بحزنها
يا مين بيسمع دقّها؟
يا مين يقرّب فرحها؟
دقّت يا مين يفتحلها باب المحبة؟

الكلام فعلا أي حد ممكن يحسه أثناء القراءة بسهولة ويسر

كمان فكرة البنات والصورة مع الكلام المكتوب في بداية البلوج ، فوق الوصف .
keep on

AmR said...

دي حاجة هايلة

دي حاجة عظيمة

:D

لا بجد دي احلى في وجهة نظري من اللي قبلها


وحاسس اني بقرا لحد محترف - صحيح انا مش
بفهم أوي في العامي

بس ماشية معاية بسلاسة وزي الفل

keep it up

وضـّاح said...

حمدالله على سلامتك
:)

كلمات جميلة كالعادة :)

cleopatra said...

كلامك جميل يا ويسبر .. وبجد .. وحشتينااااااااااااا اوي ..

يمكن انا اللي مش بدخل بلوجات بقاللي فترة ... بس مفتقداكي من علي المنتدي كمان

يا رب تكوني تمااام

من القلب said...

ماشاء الله جميله اوى كتابتك
دى اول مره ازور مدونتك
بس عجبنى اسلوبك


مش عارفه حسيت منها لمحه حزن
ودى حاجه محليها


اتمنى زيارتك لمدونتى

مواطن مصري said...

بصراحه , ومن غير شرح ولا تحليل كلام جميل وليه القلب يميل

محمد محيي الدين said...

الكلام لما بيكون خارج من القلب بيوصل لكل اللي يقرأه
ومنتظرينكم من تاني علي البلوج وعلي المنتدي