حد منكم بحب اكلة الكوسة ؟؟
مش عارفة ليه انا متقبلة اكل اي اكلة الا الكوسة بتخنق اوي منها
من يومي وانا بحب المعاملات الشريفة بقى
:D :D
وانا داخلة شفوي لدكتور من الدكاترة ربنا يستر عليه بقى
كنا كتير اوي داخلينله
لقيته بعلو صوته بقول
يا جماعة اللي معاه واسطة ييجي على اليمين عشان نخلصه بدري
واللي ما معهوش يتركن على جنب
يا حلاوتك يا حلاوتك
!!!!
طبعا انا البنوتة المغلوب على امرها لا ليا في حوارات الكوسة ولو حتى ليا حد اعرفه في الكلية يبقى برضه مش حرضى اني ادخل بالكوسة
فضلت يا عيني مركونة على جنب ناقص ارفه ايدي واحط وشي في الحيطة -_-
ولد زميلي اعرفه متخرج
عاوز يشتغل
الولد ده شاطر جدا ما شاء الله
عمل انترفيو في شركة وجاوب على اسئلتهم بطريقة حلوة جدا
واتصلوا فيه فعلا وقالوله احنا بنرشحك للوظيفة
مفيش كام يوم رجعوا اتصلوا بيه تاني وقالوله معلش المكان اتاخد من ابن عم المدير
ربنا يخليلنا المدير وقرايبه كلهم يااااااااااااارب
حاجة حصلت معايا انا للاسف
لجنة الشفوي مليانة جدا
الناس بتزق في بعضها في كل اتجاه
رحت رايحة مدية البواب 5 جنيه
وراح مدخلني من مكان سري عشان امتحن واروح بيتنا !!
وانا ماشية بالعربية مع اخويا
اخويا ده متهور جدا في سواقته ولا يفرق معاه حاجة
ببقى طايرة معاه في العربية ومتنشنة تنشنة منيلة بنيلة
طبعا الاشارات كلها اتكسرت
وفي كل اشارة تتكسر
عشرين جنيه ولا حتى عشرة جنيه للشرطي تخلي نمرته تتمسح من كشكول المرور المحترم !!!
ولو معرفش يزبط الشرطي
فيه كوسة جامدة اوي عنده في المرور
حتمسح سجله كله
دي بقى مش حتصدقوها
ظهرت نتيجتنا في الكونترول وكلنا بقينا نخش ونسأل عليها
واحدة صاحبتي دخلت لقت تقديرها جيد
ادت الدكتوربتاع الكونترول وخدوا بالكم من لقب دكتور دي خمسين جنيه خلاها جيد جدا
!!!!
والله العظيم ما بهرج
وواحد اعرفه دخل بعدها علطول كان فاضله درجة على النجاح
فضل يترجى في الدكتور يرفعه الدرجة دي
ولا وافق
يا عيني الولد ما عرفش طريقة الفلوس المتبعة
خلاص الخضار الاساسي في مصر بقى الكوسة
عشان تتنفس صح محتاج كوسة
عشان تعيش صح محتاج كوسة
عشان تشتغل صح محتاج كوسة
عشان تخش الكلية الفلانية محتاج كوسة
عشان تزبط الدكتور الفلاني محتاج كوسة
عشان تتجوز مممممم مش عارفة هيه دي كمان بقت كوسة ولا لسة ؟؟
حكاوي وقصص عن الكوسة في مصر
كلنا مرينا بيها وكلنا حسينا بيها
ياترى حييجي وقت وتعامل الكوسة يقف ؟؟؟
بتهيألي لو بطلوا يبيعوا كوسة في الاسواق
حتفضل كوسة مصر موجودة برضه !!
!!!!
19 comments:
على فكره النبى عليه الصلاة و السلام كان بيتتبع الكوسه فى الاناء
و كانت من احب الاطعمه الى قلبه
طب احنا دلوقتي بنتكلم عن الكوسة اللي هيا الواسطة
مش الكوسة اللي بتتاكل يعني
ومازلت عندي رأيي
( لو كان النيل كله صلصة ..ما كانش كفى الكوسة اللي في البلد )
-_-
دخلت إمتحان السيكولوجي
واحد جمبي معاه واسطة
الدكتورة بتقوله ، إخترلك سؤال من اللي ورقة الأسئلة من اللي إنت حليته في الإمتحان
إختر أسهل سؤال وخد 38 من 40
بينما أنا إتسألت سؤال وجااوبته صح وخدت 32
:D
في شفوي التحليلية
واحد صاحبي دخل الدكتور بيقولوا إخترلك حاجة من اللي إنت درستتها وإتكلم عليها
:D
بلاش نفتح في حكايات الواسطة دي لحسن مش هتقفل
أه خدي دي كمان
في شفوي الأورجانيك
واحد صاحبي حالته كانت صعبة خالص ..
ليه كوسة في شئون الطلاب وصى عليه ، دخل جاب 100 من 100
وعارفين نجح بإيه ؟ بمقبول
يعني ده اللي نجحوا بجد !
ياللا بقى كفاية كده مؤقتاً
طب يا ترى الكوسة بقى مطبوخة ولا معمولة محشى
اصلها تفرق كتير
على العموم بسيطة
وبعدين اختى من حق اللى معاهم وسايط يبقوا فى المقدمة
السلام عليكم
:)
جزاك الله خيرا حلوة اوي معلومة النبي صلى الله عليه وسلم
دكتور عمرو :)
ايه ده !!!
هوه انت مش بتدخل غير مع حد بواسطه
وبتفضل مستحمل وانت بتشوفهم كلهم كدة ؟؟
والله حاجة تقهر ::(
اخ مؤمن محمد ,,
من حق اللي معاه كوسة يبقوا في المقدمة :D
ممكن برضه
لدرجة انهم ياخدوا مكاني في الامتحان واستناهم كلهم يمتحنوا وانا بدل ما امتحن السعة تسعة الصبح
امتحاني يبقى الساعة اربعة العصر ؟؟؟
مساء الكوسة عليكى
الحاجات دى والله ولا بتأثر
اكيد ربنا مشهيضيع مجهود حدبردو فى الاخر
بس عادى يعنى هماا لخسرانين
تحياتى
انا كمان معايا واحده فى السيكشن بيتكوس لها
بس انا بستنى لما تدخل الشفوى واطمن عليها :D
وبعد كده ادخل فى الجروب الى بعدها
بمناسبة الكوسة
حاجة مضيقاني جامد من ساعة شفوي الفسيولوجي و قفنا مستنين يجي ساعة و نصف على ما الناس اللي معاها كروت توصية خلصت و اللي يغيظ بقى إن ده موضوع عاداااادي جدا
يعني المعيدات هما اللي ماسكين الكروت دي و بيدورا على أصحابها و يدخلوهم معززين مكرمين
و أنا بقى بأمتحن دخل شاب محترم على الدكتورة و قالها أنا مش عارف مين كده
الدكتورة رمتني خالص و قعدت تكتب ورقة لدكتور تاني علشان ياخد باله منه
و لا الكوسة بقى اللي بتجنني هي في النتيجة
يجي نصف الدفعة بيعرفها و إحنا لسه بنبقى مستنينها مع الناس الغلابة اللي زينا
يلا كفاية كده أهو طلعت اللي جوايا شوية
معلش دوشت دماغك يا فلونا
بريك :)
كويس انك جبتي سيرة انهم الخسرانين والحاجات دي مش بتأثر
انا كنت بكلم صاحبتي على اني واثقة ان ربنا حينصرني وفي الاخر كلنا بنتساوى
دخل الحوار معانا ولد عاد السنة على خمس درجات
اعد يقولي انا بابا كان بترجاني ادخل بواسطة وانا كنت اعد اقول واسطتي ربنا
وشوفيني اهو
عدت السنة على خمس درجات بس !!
خلاني سكت ومعرفتش اقوله ايه ؟؟
ممممممممم !!!
لوزة
ليه يا بنتي اساسا الزقي في اي واحدة معاها واسطة الدكتورة حتديكي نمرة مش بعيدة عنها فانتي حتكسبي :D
QUEEN OF ROSES
الحاجات دي بتحصل معانا كلنا فعلا
بقولك فضلت مستنية من الساعة تسعة الصبح لاربعة العصر لحد لما بتوع الكوسة يخلصوا ودي مش لجنتهم !!
يا بنتي لا يسعنا سوا ان نقول
حسبي الله ونعم الوكيل !!
الله الغنى عن الدرجتين دول
انا دمى بيتحرق بسرعه
انا بكره الكوسة
فعلا مش بحب اكل كتير .. ومش باكل اكل كتير
بس الكوسة ليها فى قلب كراهية مش عارف ليه
مش بطيق اشوفها حتى ... نماذج الكوسة اللىحضرتك قولتيها دى رائعة
بتمثل مدى كراهيتى ليها
ربنا يصبرنى ومتحوجش ليها .. لانى لو اتحوجت ليها برضة مش هستخدمها
حلو موضوعك يا اخت فلونا
ممممممم
هنعمل إيه بس فى الناس دى
ربنا يهديها
يعنى لو الشعب اصلا ماشى بقال الله وقال الرسول مش هيفيد ان الدولة تكون فيها كوسة الكوسة هتخلص لوحدها
لكن القانون مانع الكوسة اصلا
والدين مانعها
لكن ولا رجال القانون ملتزمون
ولا الشعب الغلبان ملتزم ولا بدينه ولا بقانونه !!!!
يبقى يستاهل إللى بيحصل فيه
الحل فى انى اعرف اخلاق دينى بقى ومش صلاة وصوم وخلاص !!
جزاكى الله خيرا على موضوعك إللى جاب صور الكوسة من الشرق والغرب دة :D
كن مرة وانا رايح الجامعه اجيب النتيجة بخلص ورق ليا في مكان وقابلت واحد ليه منصب معين في وزراة الداخلية فقالي تعرف فلان (قائد الحرس بتاع الكلية ) قولته ايوه اعرفه فراح مخلصلي ورقي بسرعه وقالي عدي عليه وقلوله فلان بيقولك فين نتيجة بنته مجبتهلوش ليه
وطلب مني اخلي قائد الحرس يكلمه يبلغه بالنتيجة
طبعاً رحت الكلية كانت النتيجة لسه مطلعتش خلصت الورق بتاعي وكدا وعديت علي قائد الحرس قولته الكلمتين دول فراح ناده لامين من اللي عنده قاله هي فلانه بنت فلان عملت ايه فامين الشرطة قاله انه جابلها النتيجة وهتعيد السنة فراح قاليه ازي دا طيب اطلع لفلان وكيل الكيلة خليه يطلع ليها النتيجة جيد
ودا اللي حصل فعلاً
في اخلي من كدا كوسه
اخ بن توفيق :)
ربنا ما يحوجك لكوسة يارب
اخ مانجر :)
كنت مرة بقول للمعيد بتاعي اني مش حلجأ للكوسة عشان حرام
اعد يقنعني ويقولي المساواة في الظلم عدل
انتي كدة مش بتعملي حاجة حرام
لما تبقى انتي مذاكرة كويس وغيرك ولا فاتح كلمة وياخد هوه اعلى منك وانتي في عرض درجة مثلا عشان تجيبي تقدير
يبقى فين العدل كدة
جه في بالي اني اقوله ماهو لو كل الناس فكرت زي حضرتك كدة عمر البلد دي ما حتتصلح
بس سكت -_-
اخ محمد :)
اه والله فعلا بقوا يغيروا في التقادير دلوقتي
وتصدق فعلا حرس الكلية اكتر ناس بساعدوا في الواسطات
ده اخر اكتشافاتي !!
حسبي الله ونعم الوكيل
جديده موضوع كوسة الكونترول بجد فيه كده ... وكمان الدكتور بيقول بصوت عالى اللى عنده وسطه يجى كده ؟؟؟؟؟؟ :0
معقوووووووووول
طيب والناس متكسفتش تيجى كده
والله العظيم حااااااجه.......... ولا بلااااش
بجد بتاعة تقدير جيد دى مش ممكن
معقول؟؟؟؟
انا فاكرة يوم امتحان الفسيولوجى العملى ..المعيد واقف وعان الموابايل مش بيبطل رن
وعمال ينادى على الارقام اللى متوصى عليهم
وكل يوم شفوى ...تلاقى كل واحد جايب معاه مماته او باباه بحس بشعور من القعر
الله المستعان
وربنا ما يحوجنا للكوسة يااارب
للاسف
مش متفق معاك بالمرة بالمرتين بالتلاتة كماااااااااااااان
الكوسة دي احنا اللي بنعملها بنفسنا وبنسويها وبعدين ناكلها
مصر ملهاش اي علاقة بالوضع دا
ياريت مش اي حاجة نقول فيها مصر السبب ومصر مش عارف ايه
مصر اكبر مني واكبر منك واكبر من اي حد يقول عليها كلمة
على فكرة موضوع الكوسة مش غلطتنا احنا ولا غلطة البلد بس
البلد بتعمل الكوسة واحنا بنقولها هاتي كمان
لو كلنا وقفنا ضدها هتقف وعمرها ما هتحكم حياتنا تاني
بس تقول ايه .... اتعودنا عليها
ايه ده بجد :s
احنا معندناش البلاوي دي :S
او على الاقل مش بشكل الفظيع ده !!!
فيه مثل مشهور اوي.. لو نهر النيل بقه صلصة مش حيكفي الكوسة فيكي يامصر :s
Post a Comment