Saturday, June 2, 2007

بابا جاي يوم الخميس :)



كلها كلم يوم وبابا ييجي مصر
إن شاء الله جاي يوم الخميس
يااااه .... بقالي كام شهر ما شوفتوش
طبعا اللي رايح واللي جاي بيتريق على السعادة الفظيعة اللي أنا فيها
وعمالين يقولولي انتي عاملة زي ما تكوني عندك 6 سنين
وبعدين انتي المفروض تكوني اتعودتي إن بابا وماما مش معاكي
وأنا طبعا أفتحها هجوم على طول
وأقولهم ( اللي ما يعرفش يقول عدس) واللي ايده في الميا مش زي اللي ايده في النار
أنا أصلي كنت متعودة أحكي لبابا كل حاجة
واٍسأله على حاجة
وفجأة بقى مطلوب مني أنسى كل دة وأعيش واتأقلم مع وضع إنه هو في مكان بعيد عني بأميااااااال طويلة
بس بستنى اليوم اللي هو بييجي فيه
ببقى عاملة احتفالية
صحيح هو جاي في الامتحانات وغالبا مش هقعد معاه
وصحيح إن بابا بيقضي معظم الوقت مع خالي وكدة
لأن بابا من النوع اللي مش بيحب قعدة البيت خالص
بس المهم إنه موجود
والله وحشني إني أقول لبابا أنا خارجة وآخد منه فلوس
بدل ما أنا مع نفسي كدة
وحشتني بجد مناقرة بابا فيا
وحشني إنه يصحيني الصبح وأنا نايمة متأخر فأتغاظ وأقوم أقفل الباب وأنام تاني
وهو طبعا على مين ... مش بيسيبني إلا لما أصحى
وحشني كلامي معاه
بابا كله على بعضه وحشني أوي
كنت حاسة إني مكسورة من غيره
أصل بابا هو اللي علمني القوة ,,, وهو الوحيد اللي كان بيقوللي لازم تبقي جامدة
لازم تاخدي حقك بنفسك
كل الناس قعدوا يقولوله ما تعودش البنت على القوة ... كدة محدش هيعرف يكلمها
بس هو كان رأيه إني مش همشي في عيشة مصر من غيره إلا كدة
فقواني بجد ... وعلمني ما أضعفش
لو قعدت أتكلم عن بابا من هنا لبكرة مش هخلص كلام
أهو جاي يوم الخميس
وأنا مستنية اليوم دة بفاااااااااااااااااارغ الصبر

26 comments:

Unknown said...

مبرووووووووووووووووووك :d

طبعاً أكيد وهو جاي بيجيب حاجات حلوة معاه

:d

فخلي الدكتور علاء يبقى يديني الحاجة الحلوة بتاعته بقى :d

ربنا يفرحك كمان وكمان

WhiSpeR said...

مبرووووووووووووووووووك :d"

طبعاً أكيد وهو جاي بيجيب حاجات حلوة معاه

:d

فخلي الدكتور علاء يبقى يديني الحاجة الحلوة بتاعته بقى :d

ربنا يفرحك كمان وكمان"

الله يبارك فيك يا دوك :)


آه طبعا بيجيب معاه حاجات حلوة
لو ما جابش حاجات حلوة احتمال كبير ما يدخلش البيت :D


بيدخل والشيكولاتات في ايده
الجالاكسي دي زي الميا والهوا بالنسبالي
ما يقدرش ييجي من هناك من غيرها

:D

بس الدكتور علاء غالبا مش هيشوف منها حاجة
:d

وبالتالي حضرتك برضه مش هتشوف منها حاجة
:d

معلش بقى خيرها في غيرها يا دوك

أنا حاسة إني فظيعة أوي
بس هو أنا كدة في موضوع الجالاكسي بنسى كل حاجة
ما بعرفش حد

:D

Unknown said...

-_-
لا بجد مينفعش

ده إسمها حتى جالاكسي

"معها تحلو .. المشاركة "

جبتش حاجة من عندي بقى

-_-

WhiSpeR said...

حضرتك بتشوف اعلانات جالاكسي ؟
كلها بتبقى بنت قاعدة بتاكل شيكولاتة في البيت لوحدها
ولو في حد في البيت بتطرده وتقعد تاكل لوحدها برضه

جيبتش حاجة من عندي كدة ؟


هي الجالاكسي بتيجي عشان سيادتي بس آكلها

دة أنا لو حد مد ايده على العلبة ممكن يجرالي حاجة

-_-

المجاهدة said...

هههه
مشاركتك الاخيرة ضحكتني قوى
:d

لا وجهة نظر بردو
:d


ابقى دورى على القطة الي هترفع سماعة التليفون بقى
:lol:



ممم
ضحكت بردو على دي اوى
"والله وحشني إني أقول لبابا أنا خارجة وآخد منه فلوس
بدل ما أنا مع نفسي كدة
وحشتني بجد مناقرة بابا فيا
وحشني إنه يصحيني الصبح وأنا نايمة متأخر فأتغاظ وأقوم أقفل الباب وأنام تاني"

:lol:
ربنا يباركلك يا رب
:)



اهلي بقالهم فترة مش سافرو -_-
ف بقالنا فترة طويلة جدا جدا محرومين من الشوكولاتة -_-

WhiSpeR said...

"ابقى دورى على القطة الي هترفع سماعة التليفون بقى"

لأ دي سهلة
هشيل الفيشة
:D


"اهلي بقالهم فترة مش سافرو -_-
ف بقالنا فترة طويلة جدا جدا محرومين من الشوكولاتة -_-"

إيه ؟
انتي كمان طمعانة في الشيكولاتة بتاعتي ؟

-_-

مفيييييييييييش
محدش هياخد حاجة
:d

Unknown said...

طب أنا أهلي هنا على طول
لا شفت منهم جالاكسي ولا بتاع :D

هو كان آخرنا زمان كيس شيتوس أيام لما كان بينزل زمااان

المجاهدة said...

:d

لا الحمد لله... الشيتوس ده احنا الي بنجيبه
:d



اهلي بيجبوا شوكولاته و هما راجعين من السفر
ممم
بقالهم كتير ماسافروش.. بالتالي مارجعوش من السفر :d
بالتالي مافيش شوكولاتة
:(

WhiSpeR said...

"طب أنا أهلي هنا على طول
لا شفت منهم جالاكسي ولا بتاع :D

هو كان آخرنا زمان كيس شيتوس أيام لما كان بينزل زمااان"


حضرتك لازم تحاول تطفشهم
عشان يجيبوا شيكولاتة وهما جايين
وطرق التطفيش كتير طبعا
:D

سمـــر مــاهر said...

انا بابا كان فاتحلى مصنع حاجات حلوه جوا الدولاب


معنديش انا اجيب حاجه واحده من الحاجه

بابا كان بيجيبلى بالعلبه علطول

يالا الحمد لله

كانت ايام


وجت عليا فتره

وكنت ببيعلهم :D

كنت اقفل الدولاب واللى عاوز حاجه يدينى الفلوس واقوم اجيبله

هههههههههه

والله كنت فاضيه

cleopatra said...

حاسه بيكي أووووووووووووي ..


انا كمان لما بيبقي بابا أو ماما جايين من السفر ببقي أخر ظأططة .. ربنا يخليهولك يا رب :) وأنا يا ستي مش مستنيه منك حاجه


انا هاااااااااااااااااجي أخد

WhiSpeR said...

"وجت عليا فتره

وكنت ببيعلهم :D

كنت اقفل الدولاب واللى عاوز حاجه يدينى الفلوس واقوم اجيبله

هههههههههه

والله كنت فاضيه"

أهي البت بتاعة التسييح جت
لسانك خليه جوا وما أسمعش كلمة
-_-
تموتي انتي في الفلوس
عثل يا خواتي ... عثل
-_-


"حاسه بيكي أووووووووووووي ..


انا كمان لما بيبقي بابا أو ماما جايين من السفر ببقي أخر ظأططة .. ربنا يخليهولك يا رب :) وأنا يا ستي مش مستنيه منك حاجه


انا هاااااااااااااااااجي أخد"

يا كليو يا حبيبتي
تعالي انتي بس
وأنا هشربك شاي
لكن جالاكسي
انسيييييي يا حبي
ساعتها مش هعرفك

:D

mohamed said...

يوصل بالسلامة ان شاء الله وتبقو مع بعض علي طول

لما شفت كلامك لقيت نفسي مبتسم ادام المشاعرة الانسانية دي :)

david santos said...

Alive the people of Palestine, against the fascism of Israel and the terrorism of the North America

Peace for Palestine

WhiSpeR said...

" يوصل بالسلامة ان شاء الله وتبقو مع بعض علي طول

لما شفت كلامك لقيت نفسي مبتسم ادام المشاعرة الانسانية دي :)"

ربنا يكرمك يا أخ محمد

أنا طلعت ندلة
بابا هييجي ما يلاقيش حد في البيت
أخويا عنده امتحان وأنا عندي حصة مراجعة مالهاش أي مواعيد تانية

:D

Maha said...

يوصل بالسلامة إن شاء الله :)

محمد said...

يوصل بالسلامة ان شاء الله :)

محمد said...

بالمناسبة إيه حكاية الشيكولاته ؟؟

والدي دايما وهو راجع من السفر يكون محمل بأكوام من الشيكولاته .. حقيقي أحلى هدية ممكن يجيبها لي معاه

Reem said...

يوصل بالسلامة ان شاء الله

المجاهدة said...

الشوكولاتة بره بتبقى دايماً احلى و ارخص
^_^

عشان كده... نا تيجي سيرة السفر.. بتيجي الشوكولاتة :d

سفر= شوكولاته

cleopatra said...

حمدا لله علي سلامة عمو يا قمر .. وانا جايالكو بقا :D

FloNa said...

حمدا لله على سلامة عمو يا جميل


زي ما قلتلك في التليفون

الحاجة تبقى عندي

وصليها بالسوبر جيت :)

break said...

هوا يوم الخميس جه ولا لسة!
انا مش عارفة النهردة ايه فايام الاسبوع
غالبا الاربع !!
لو كان باباكى جه يبئا حمدلله على سلامته
لسة مجاش يبئا يوصل بالسلامة
وابئى قوليله انى نفسى فشيكولاتة سينزى تبع جالاكسى بردو

تحياتى

WhiSpeR said...

هوا يوم الخميس جه ولا لسة!
انا مش عارفة النهردة ايه فايام الاسبوع
غالبا الاربع !!
لو كان باباكى جه يبئا حمدلله على سلامته
لسة مجاش يبئا يوصل بالسلامة
وابئى قوليله انى نفسى فشيكولاتة سينزى تبع جالاكسى بردو

تحياتى



لأ الخميس جه خلاص
وبابا جه الحمد لله

سينزي مرة واحدة ؟؟
إيه الناس اللي داخلة على طمع دي
:D

break said...

لا طمع ولا حاجة هبئا اديكى حتة منها بردو
انا نفسى فيها اوى ومش لاقياها
ولا خلاص بئا مادام بابا جه هيجبهالى منين
انا هرضى باى نوع هوا جايبه
حمد لله على سلامته

cleopatra said...

مفيش
NUTELLA
ليا ؟؟