Saturday, June 30, 2007

صباحو كوسة





حد منكم بحب اكلة الكوسة ؟؟
مش عارفة ليه انا متقبلة اكل اي اكلة الا الكوسة بتخنق اوي منها
من يومي وانا بحب المعاملات الشريفة بقى
:D :D


وانا داخلة شفوي لدكتور من الدكاترة ربنا يستر عليه بقى
كنا كتير اوي داخلينله
لقيته بعلو صوته بقول
يا جماعة اللي معاه واسطة ييجي على اليمين عشان نخلصه بدري
واللي ما معهوش يتركن على جنب
يا حلاوتك يا حلاوتك
!!!!

طبعا انا البنوتة المغلوب على امرها لا ليا في حوارات الكوسة ولو حتى ليا حد اعرفه في الكلية يبقى برضه مش حرضى اني ادخل بالكوسة
فضلت يا عيني مركونة على جنب ناقص ارفه ايدي واحط وشي في الحيطة -_-


ولد زميلي اعرفه متخرج
عاوز يشتغل
الولد ده شاطر جدا ما شاء الله
عمل انترفيو في شركة وجاوب على اسئلتهم بطريقة حلوة جدا
واتصلوا فيه فعلا وقالوله احنا بنرشحك للوظيفة
مفيش كام يوم رجعوا اتصلوا بيه تاني وقالوله معلش المكان اتاخد من ابن عم المدير
ربنا يخليلنا المدير وقرايبه كلهم يااااااااااااارب


حاجة حصلت معايا انا للاسف
لجنة الشفوي مليانة جدا
الناس بتزق في بعضها في كل اتجاه
رحت رايحة مدية البواب 5 جنيه
وراح مدخلني من مكان سري عشان امتحن واروح بيتنا !!



وانا ماشية بالعربية مع اخويا
اخويا ده متهور جدا في سواقته ولا يفرق معاه حاجة
ببقى طايرة معاه في العربية ومتنشنة تنشنة منيلة بنيلة
طبعا الاشارات كلها اتكسرت
وفي كل اشارة تتكسر
عشرين جنيه ولا حتى عشرة جنيه للشرطي تخلي نمرته تتمسح من كشكول المرور المحترم !!!
ولو معرفش يزبط الشرطي
فيه كوسة جامدة اوي عنده في المرور
حتمسح سجله كله


دي بقى مش حتصدقوها
ظهرت نتيجتنا في الكونترول وكلنا بقينا نخش ونسأل عليها
واحدة صاحبتي دخلت لقت تقديرها جيد
ادت الدكتوربتاع الكونترول وخدوا بالكم من لقب دكتور دي خمسين جنيه خلاها جيد جدا
!!!!
والله العظيم ما بهرج
وواحد اعرفه دخل بعدها علطول كان فاضله درجة على النجاح
فضل يترجى في الدكتور يرفعه الدرجة دي
ولا وافق
يا عيني الولد ما عرفش طريقة الفلوس المتبعة
خلاص الخضار الاساسي في مصر بقى الكوسة
عشان تتنفس صح محتاج كوسة
عشان تعيش صح محتاج كوسة
عشان تشتغل صح محتاج كوسة
عشان تخش الكلية الفلانية محتاج كوسة
عشان تزبط الدكتور الفلاني محتاج كوسة
عشان تتجوز مممممم مش عارفة هيه دي كمان بقت كوسة ولا لسة ؟؟




حكاوي وقصص عن الكوسة في مصر
كلنا مرينا بيها وكلنا حسينا بيها
ياترى حييجي وقت وتعامل الكوسة يقف ؟؟؟
بتهيألي لو بطلوا يبيعوا كوسة في الاسواق
حتفضل كوسة مصر موجودة برضه !!

!!!!

Wednesday, June 27, 2007

فينك يا ويسبر :(


في ثانية ثانوي كانت اعدة ادامي
كل شوية تلفلي وتعد تتكلم شوية لحد لما المس تفوقلنا تاني ونرجع للحصة
كانت بتتكلم عن اخوها كتير انه دخل طب واد ايه البيت مفتقده !!!
فاكره كلامها اوي عدت السنة واحنا بنتعرف على بعضنا وبنختبر بعضنا
سبحان الله كانت تجمعنا اراء سياسية واحدة
واجتماعية متطابقة
الناس كلها تقول كدة انا وويسبر نقول حاجة عكسها
بدأت بوادر الفشل المشتركة تجمعنا من اول تعارفنا
وابتدت خطط الهروب من الحصص تعمل شغل جامد معانا :D
من يومي انا وهيه دماغنا عالية اوي مش فارقة معانا دنيا !!!

فاكرة لما هربنا من حصة الفيزيا والست اللي بتمسك البنات دي كانت حتمسكنا
اعدنا نجري نجري نجري بس كنا بندحك اوي واحنا خايفين
عرفنا نفلت منها !!
فاكرة كمان في حصص الالعاب لما كنا نعد مع بعض والفصل كله يتلم علينا
كان لينا حكاوينا الجذابة دلوقتي حكاوينا بقت في البلوج بتاعنا
:D
صحابي كلهم كانوا بغاروا منها عشان واخدة مكان كبير في قلبي
وصحابها كلهم كانوا بيتساءلوا مين فلونا دي اللي خدت ويسبر مننا

في تالتة ثانوي كانت تجمعنا امال كبيرة
فاكرة رحلة دبي بتاعة المدرسة وقفنا عند محل معين جبنا منه سلاسل وبتاع
ويسبر كان نفسها تبقى صيدلانية فجابت سلسلة على شكل انبوبة اختبار كدة جواها مكتوب
( i love u )

وانا كان نفسي اطلع مهندسة كومبيتر او دكتورة سنان بقى :)
بس ويسبر قالتلي جيبي زي دي عشان نطلع زي بعض
واهو يختي طلعت صيدلانية وانبوبة الاختبار بتاتك لابساعا في رقبتي اهي :) :)

في ثانوية عامة فاكرة ضغط الدراسة كان عامل معانا ازمة
كنا بنزعل من بعض وتاني يوم نتصالح
ناس كتير كانوا حيبعدونا عن بعض بس فضلت انا وهيه صحاب جدا

دخلت الكلية ودخلت هيه نفس الكلية في القاهرة مممممم ومع ذلك عايشين مع بعض الحياة بتفاصيلها

كل حاجة عني هيه تعرفها وكل حاجة عنها انا اعرفها
مكالمات وفواتير فوق ادمغة اهالينا ولا هاممنا
:d بجد بجد مبعدتش عني خالص ولما نتقابل في الاجازات بتبقى احلى لقاءات كفاية المؤامرات اللي بتحصل فيها واسأل مجرب :) تحس ان الجسد والروح رجعوا لبعضهم
كان فيه حد قريب بيسألني مين اقرب واحدة ليكي قلت بدون تردد ويسبر
مع ان الجامعة عرفتني بناس كتير بس مش لقيت زيها


مممممممممم
ويسبر مفتقداكي جدا :(
ازاي يا وحشة تسيبيني لوحدي اسافر دي اول مرة تحصل !!!
بفتكر ايام الاجازات اللي فاتت كان زمانا بنعمل حاجات جديدة وافكار جديدة ومؤامرات جديدة

سيبك من الاورجانيك بقى وارجعي لو سمحتي عشاني مفتقداكي اوي :(

Monday, June 25, 2007

تاج على الماشي :)



انت مين ؟؟

مممم واحدة اقل من الناس :(


مين اكتر ست اشخاص بتحبهم ؟؟

اشمعنى ستة طيب ؟؟

طيب هوه سؤال مش عادل فيه ناس كتير بجد مينفعش منذكرش اساميهم

لو عرفت اعمل لستة حبقى ارجع اكتبها :)


انت سعيد؟

الحمد لله بجد اه :)


لو اجتمعت انا وحسني مبارك في غرفة واحدة؟

اكيد تبقى معنديش فرصة اتكلم

مش حجتمع معاه الا وانا عاملة مصيبة

وساعتها حيبقوا سادن بؤي بكمامة :p


لو معاك مليون ونص جنيه......تعمل بيهم ايه؟

كنت بنيتلي كوخ كدة جميل على جزر هاواي ونسيت نفسي هناك

ونسيت حاجة اسمها صيدلة :(

بتحب مصر؟

جدا مش عارفة ليه بس جدا :)


بتحب البنات؟


عجبني اوي السؤال ده
:D

السؤال ده مش ليا اكيد

:)

ومش ناوية احرفه :p

انت مسلم ؟

اه الحمد لله

ليه؟

دي فطرتي السليمة :)

مين اكتر شخصية ما تقدرش تستغنى عنها في حياتك؟وليه؟

منى اختي بحبها جدا ومش بعرف اشوف نفسي من غيرها


ايه اكتر موقف محرج اتعرضت ليه في حياتك؟واتصرفت ازاي؟

:D :D

فاكرة السنة دي وانا داخلة المحاضرة متاخرة

كانت محاضرة سيوتكس

دخلت والقيت نظرة خاطفة على الدكتور لقيته مشغول بالشرح

فرحت خاطفة رجلي ونزلت على الارض علطول

وانا بقى بدحك مبسوطة اني انتصرت ودخلت

لقيت صوت الدكتور في الميكروفون

الانسة اللي دخلت من شوية تقوم تقف :)


قلت يلا باينها ليلة مش معدية :D

حاولت اتملص بس لقيته مركز نظره عليا

قلت اقوم وامري لله

قمت وانا بدحك مبسوطة بنفسي اوي :D


لقيته بقولي مش المفروض بعد ما تدخلي تقفلي الباب وراكي

انا تنفست الصعداء قلت الحمد لله انه ما طردنيش

قلتله اوامرك يا دكتور وانا بدحك عشان اخفف من واقع الاحراج اللي حصللي

لقيت ولد ربنا يكرمه راح قايم وقالي خليكي انتي وراح قافل هوه الباب

كرم اخلاق بقى :D

جيت اعد

لقيت صوت الدكتور يجلجل مرة اخرى

معلش قومي اقفليه انتي يا انسة

احم احم

ايه الاحراج ده

غلاسة دكاترة بقى

رحت قايمة قلتله اللي تؤمر بيه يا دوك

رحت فاتحاه وقافلاه تاني وانا برزعه واعدت

بس كدة :)
ايه الأمنية اللي بتدعي ربنا دايما انه يحققها لك؟

انه يهديني ويرضى عني

اللهم انك عفو كريم تحب العفو فاعف عنا

تمرر التاج دة لمين؟

امرره

رنين الصمت

كلمة وواقفة في الزور

كش ملك

انا مش معاهم
خليها لويسبر بقى تمرره للي هيه عايزاه :)

Thursday, June 21, 2007

وطني بين لوعة ولهفة





قمة بين اولمرت وعباس ومبارك وعبد الله الثاني الاثنين في مصر





مممممممم


بعد الاحداث المتسارعة الاخيرة


كان من المتوقع عقد اي منظر ( اجتماع يعني ) بين الاخوة الاعضاء الكرام لمناقشة ما حدث في غزة


والذي يعتبره البعض انقلاب ضخم يستوجب وقفة امنية حادة



يمكن تقلب بحرب مين عارف


:) :)



اعدت اقرا في الخبر وادحك وانا خايفة



هيه عادة الاجتماعات دي مبتجبش نتيجة اوي



بس مع معرفتنا ان فيه رؤوس كبيرة وراء الموضوع




يبقى احتمال ان الموضوع يقلب جد



باعتبار انه كان تهريج يعني في الاول


:) :)


تفتكروا الناس دي حيطلعولنا قرارات ممكن تقلبها على دماغنا ؟؟



ولا احنا ممكن ندي ثقتنا الكاملة في حماس في صد اي تنظيم ممكن يتعمل ضدهم


مش عارفة


بس اللي متأكدة منه ان الايام الجاية اكيد تحمل لنا الكثير


في ظل الظروف الراهنة


يختلج قلبي شعور باني مش طايقة نفسي


:(


حاسة اني تايهة اوي وحاسة اني تعبانة اوي وانا مش وسط شعبي


حاسة اني بعيدة عنهم اوي وعمري ما ححس باللي هم حاسين بيه



!!


ساعات بعد اقول ياربي لو انا وسط شعبي دلوقتي مش كنت حقدم ليهم كتير


!!!



مش عارفة بس اكيد كان وضعي حيبقى احسن من وضعي دلوقتي


وانا بعرف اوضاعهم زيي زي اي مواطن من التلفزيون


انا نفسي اشم تراب وطني ونفسي احس بنسيم هوائه



نفسي اجري بين تلاله ونفسي ارجع اتكلم لهجتي الاصلية



انا حاسة ان هويتي اتمحت خلاص



ولا هيه اتشهوت وحترجعلي في يوم من الايام ؟؟



مش عارفة مش حاسة اني ممكن اشوف بلدي دي على الاقل في عهدي



بس بجد لو ضاقت بي السبل يبقى مفيش غير اني أأجر طيارة اروح بيها بطريقة غير قانونية الى فلسطين لحد لما الرادار يلقطني ويبعتولي صاروخ يفجر طيارتي



وتنزل اشلاء جثتي على تراب وطني لتلامسه



....

Monday, June 18, 2007

جنا ... سارا







الايام اللي بعيشها دي بتفكرني باغنية ايام وبنعيشها






ياااه تعبت تعب فعلا متعبتوش قبل كدة ابدا !!









في وسط خضم الامتحانات انتظر ولادة اختاي منى ومروة






منى حتولد في الاسماعيلية ومروة حتولد في الامارات






منى معاد ولادتها قبل مروة بكام يوم






عشان كدة ماما جت تشهد الولادة الاولى لمنى اختي :)









انا اعدة في اسكندرية بمتحن وانا على اعصابي مستنية في اي وقت خبر ولادة اختي









اختي = انتيمتي وتكفي الكلمة دي لتعبر عن علاقتي بمنى






تعتبر روحي التانية :)









المهم امتحنت المواد كلها وفضل عندي المادة الاخيرة






وكنت مطالبة باعمال لا يقدر عليها الا الرجال من نقل لثلاجة وميكروويف واستقبال ميكانيكيين وخدامين وحاجات كدة مش حدخل في تفاصيلها









وفي وسط ده كله جالنا خبر ولادة منى






منى جابت جنا :)









كانت سعادتي لا توصف رغم تعب اختي الشديد في الولادة الا انها رزقت باول بنوتة لها واسمها جنا









وزي القمر ما شاء الله
القوا نظرة كدة على البنوتة
قولوا ما شاء الله :)









خلصت امتحاني يوم 17/ 6 لاركب اول قطر رايح الاسماعيلية




مفيش ادامي غير سويعات اشوف فيها بنت اختي عشان طيارتي الى الامارات يوم 18 / 6 ظهرا




وفعلا وصلت لاخذ جنا في حضني بقوة وتكاد تدمع عيناي من شدة تأثري ان منى اختي وحبيبتي اصبحت اما لبنوتة جميلة زي جنا






ومفيش نمت كام ساعة برضه لاكمل 4 ايام من عدم النوم والارهاق الشديد




فأستيقظ على اصواتهم قومي قومي عشان تلحقي الطيارة






فعلا قمت بصعوبة بالغة عشان الحق طيارتي وركبت الطيارة




وقبل ما اقفل الموبايل




تليفون جاني




مروة ولدت في الامارات وجابت سارا






لم اصدق اذناي واعدت اضحك جامد اوي






قلت انا سبت نونو هناك عشان اشوف النونو هنه




ركبت الطيارة لاحلق في السماء اربع ساعات تقريبا




ومحاولات النوم باءت جميعها بالفشل ليستقر الامر على مشاهدتي لفيلم تشيكن ليتل وانا عيناي نصف مفتوحتان وضحكاتي نصف ضحكات




فالفيلم مثير جدا زي ما عارفين :)




وبعد هبوط الطائرة وانتهاء اجراءات السفر المملة




ركبت عربية اخويا احمد وبصوت قوي ومتماسك




وديني على المستشفى عاوزة اشوف سارا




وفعلا انطلقت الى المستشفى لاكون بجوار اختي مروة الكبيرة :)




سارا رائعة في جمالها ما شاء الله اعدت معاها دقائق معدودة اتأمل في وجهها لاقارنه بجنا واضحك من داخلي من شدة فرحتي

بس معرفتش مصورها كنت مش قادرة بقى بجد :)


وعدت الى المنزل لاستلقي على السرير متعبة مرهقة




وتأتي مريومة اول بنوتة للعائلة لتزعجني بضحكاتها ودلعها الزائد






مش ححرمكم من صورتها لسة مصوراها دلوقتي وهيه بتزعجني




دلوقتي بقيت خالة لتلات بنات
مريومة اول بنوتة
وسارا اختها لسة مولودة النهاردة :)
وجنا البنوتة الجميلة
حقي افرح مش كدة
:9 :)

Tuesday, June 12, 2007

شوية فرفشة








النهاردة لسة مخلصة امتحان الكوجنوزي



وما ادراك ما الكوجنوزي




فمجرد اني اخلص الامتحان , ده في حد ذاته فرح محتاجله زفة ومعازيم



فقلت ادخل البلوج العزيز




وافرفشلكم شوية




النهاردة دخلت لدكتورة امتحن عندها شفوي



المهم كانت اكسترنال انا قلت حتوكل على ربنا وادخل



دخلت واعدت مع تلات بنات امام مصيرنا المميت



عينات المورفولوجي ادامنا وعنينا جايبة يمين وشمال ياترى حتسألنا في ايه وحتستنى علينا ولا لأ


انا كنت موقنة تمام اليقين اني حنيل الدنيا بما اني نيلتها في الامتحان فلازم انيلها في الشفوي



الكوجنوزي ده بطير طيران والله


المهم لقتها بتسألنا عن اسامينها


فقلتلها اسمي ببراءة شديدة



ايه ده يا جماعة ملاك بريء اعد



لا مش ملاك الصراحة كان كتكوت مبلول


لقيتها بتبصلي نظرة شزرا كدة



وبتقولي



ايه ده انتي فلسطينية ؟؟



وهنا تسارعت دقات قلبي



ماهي يا تبقى مناصرين للقضية الفلسطينية وتمشي معايا زي السكينة في الحلاوة



يا بقى تقولي كلام يوجع قلبي وده اللي بيحصل من ناس كتير للاسف



قلتلها بشك


اه



قالتلي وايه اللي جابك هنه مش تعدي في بلدكم احسن



مممممم شطت غضبا للحظة بعدين رجعت لعقلي



اعقلي يا بت يا فلونا دي معايا 30 درجة



طيب قلتلها لا ماهو انا عشان ماما مصرية



قالتلي وعندك حد هناك


وهنا قلت حردهالها في الكلام بطريقة مش مباشرة



رحت قايلة بحدة



اه عندي عمتي وماتت من شهر


سرعتي في القاء الجملة وانفعال خلوها تبرفقلي كدة



قلت اوباااااا



خليني ارجع لعقلي تاني



عدلت من وضعيتي لتعود نظرة البلاهة ترتسم على وجهي من جديد



قالتلي ماتت بالرصاص ولا ايه



قلتلها لا موتة طبيعية والله !!



البنات اللي معايا راحوا بصينلي انه اسكتي عشان طريقة كلامك بايخة


قالتلي طيب مش بتروحي هناك ليه



قلتلها للاسف مليش اني ادخل فلسطين معايا وثيقة مصرية


راحت قالتلي بسرعة احسن برضه


اتنفرزت اوي وسكت !!



احسن برضه ايه ده الواحد يتمنى يروح هناك



يلا مش مشكلة اخرها ايه يعني تديني درجتي وحمشي من عندها وخلاص



مش حقولكم طبعا الامتحان والاسئلة خلاص بقى داروا عليا



بس الطريف اني في الاخر وانا ماشية ايديا جت على عينات المورفولوجي ورحت موقعة منهم حاجات



ليدوي الصوت ويرن في ارجاء المعمل وهيه بتبصلي بنظرة ثاقبة



ان قلت خلاص خدت الزيو فور شور



تمالكت اعصابي وعدت لنظرة الكتكوت المبلول بتاعتي ليتردد صوتي خائفا مرتعشا



انا اسفة سوري بجد بجد




المهم انا خارجة من الامتحان بضحك اوي



اد ايه انا عندي مواهب ممثلة بارعة



طب والله صيدلة دي بتكتشف فينا مواهب جامدة



ولسة ياما حنشوف :)

Saturday, June 2, 2007

بابا جاي يوم الخميس :)



كلها كلم يوم وبابا ييجي مصر
إن شاء الله جاي يوم الخميس
يااااه .... بقالي كام شهر ما شوفتوش
طبعا اللي رايح واللي جاي بيتريق على السعادة الفظيعة اللي أنا فيها
وعمالين يقولولي انتي عاملة زي ما تكوني عندك 6 سنين
وبعدين انتي المفروض تكوني اتعودتي إن بابا وماما مش معاكي
وأنا طبعا أفتحها هجوم على طول
وأقولهم ( اللي ما يعرفش يقول عدس) واللي ايده في الميا مش زي اللي ايده في النار
أنا أصلي كنت متعودة أحكي لبابا كل حاجة
واٍسأله على حاجة
وفجأة بقى مطلوب مني أنسى كل دة وأعيش واتأقلم مع وضع إنه هو في مكان بعيد عني بأميااااااال طويلة
بس بستنى اليوم اللي هو بييجي فيه
ببقى عاملة احتفالية
صحيح هو جاي في الامتحانات وغالبا مش هقعد معاه
وصحيح إن بابا بيقضي معظم الوقت مع خالي وكدة
لأن بابا من النوع اللي مش بيحب قعدة البيت خالص
بس المهم إنه موجود
والله وحشني إني أقول لبابا أنا خارجة وآخد منه فلوس
بدل ما أنا مع نفسي كدة
وحشتني بجد مناقرة بابا فيا
وحشني إنه يصحيني الصبح وأنا نايمة متأخر فأتغاظ وأقوم أقفل الباب وأنام تاني
وهو طبعا على مين ... مش بيسيبني إلا لما أصحى
وحشني كلامي معاه
بابا كله على بعضه وحشني أوي
كنت حاسة إني مكسورة من غيره
أصل بابا هو اللي علمني القوة ,,, وهو الوحيد اللي كان بيقوللي لازم تبقي جامدة
لازم تاخدي حقك بنفسك
كل الناس قعدوا يقولوله ما تعودش البنت على القوة ... كدة محدش هيعرف يكلمها
بس هو كان رأيه إني مش همشي في عيشة مصر من غيره إلا كدة
فقواني بجد ... وعلمني ما أضعفش
لو قعدت أتكلم عن بابا من هنا لبكرة مش هخلص كلام
أهو جاي يوم الخميس
وأنا مستنية اليوم دة بفاااااااااااااااااارغ الصبر