Tuesday, August 5, 2008

عودة جديدة .... وليه راضي ؟

عودة جديدة للكتابة ... بعد ما قفلنا البلوج فترة لا بأس بها من الزمن
دي رسالة لكل اللي بيستسلم بسرعة .. ولكل واحد بيغرق نفسه في الهموم ويكشّر
دي رسالة ليا قبل أي حد لأني نوعا ما من الناس دي:D
ما تخليش اللي حواليك يفقدوا الأمل فيك..
حاول تكون انت الأمل حتى لو مفيش أي حاجة تدعو للأمل ... وهو مفيش فعلا بس عااااااااادي ...
خللي عندك أمل في ربنا ودة كفاية
وطبعا خللي عندك أمل في الناس اللي بيحبوك
وما ترضاش ان الحزن يسيطر عليك وما ترضاش ان حد يظلمك وتقهر نفسك عالفاضي من غير ما حتى تحاول تاخد حقك
خليك قوي ... عشان احنا في زمن وحش ... الضعيف فيه بيموت مقهور
:)

وليه راضي ؟
ضعيف دايما .. كدة مسلّم
وييجوا عليك .. تقول عادي
وجواك تبكي تتألّم
وليه حسّك كدة هادي ؟
وليك الحق تتكلّم
وليه حزنك عليك قاضي؟
وفيك الفرح متكتّم
وليه بتنهار كدة قصادي؟
كأنك طفل متيتّم
وليه نهارك كدة رمادي
ونورك مطفي ومعتّم
وليه تسكت ؟
وليه راضي ؟
و جرحك فيك كدة معلّم
هخليك صفحة م الماضي
ما حلمي بايدك اتهدّم
عليك بعلن أنا حدادي
عليك ببكي وبتندّم

8 comments:

محمد said...

أولا حمدا على سلامتك يا ويسبر ..
أظن إنك أنهيتي دراستك !!

الضعيف هذه الأيام لا يموت قهرا .. ولكن يموت قهرا وغيظا وذلا وجوعا وغرقا .. في ظل الأطماع المتزايدة داخل نفوس فئة كبيرة من الجنس البشري

ولكن دائما يوجد أمل ..

عود أحمد :)

WhiSpeR said...

الله يسلمك يا أخ وضاح
وفعلا مبسوطة جدا ان حضرتك أول واحد ترد بعد عودتنا

فعلا الضعيف مالوش مكان في الدنيا دي
لازم الواحد يبقى قوي بس مش لازم يبقى شرير
ولو انه بعض الشر مفيد أحيانا
:D

FloNa said...

هوه من اولها تقطيم كدة يا ويسبر !!! ماشي يا عم المتفائل كنتي تدعيلي احسن :):)

WhiSpeR said...

طب تصدقي وتآمني بالله
انتي ولا كنتي في بالي نهائي أصلا
و الأهم من كدة بقى
القصيدة دي مكتوبة بتاريخ 3-7
يعني من شهر أو أكتر
والقصيدة دي موجهة للمواطن المصري المطحون على فكرة
وانتي لا مواطن مصري ولا مطحون
وبعدين شايفاني لابسة اسود عليكي يعني ؟
وبعدين أنا مش متفائلة نهااااااائي وانت عارفة كدة كويس
والقصيدة دي موجهة ليا أنا قبل أي حد
:)

دهاء سياسي said...


يا الف حمدا لله على سلامة المدونة :)

ياه الواحد كان حاسس ان الدنيا جفاف كده مش عارفه ليه .. بس كنت كل ما ادخل و ما الاقيش غير كلوزد " ده انجليزي على فكرة :) " احس باحباط .. كنت كل مرة بادخل و انا بقول لنفسى حيكونو فتحو تانى باذن الله :)

ارجعو تانى نورو عالم التدوين بتدويناتكو من جديد :)

باذن الله تكون العودة دى اشد و اجمل من الى قبلها :)

ربنا يكرمكم يااااااااا رب :)

عمك ياض said...

يييييييييييه
ايه اللي فتح البلوج دي تاني :P

WhiSpeR said...

دهااااااء سياسي
حبيبة هارتي
أنا عارفة يا بنتي انك ما كنتيش قادرة تعيشي من غير المدونة بتاعتنا
عشانك بقى و عشان كل الغلابى اللي مش قادرين يعيشوا
احنا اتنازلنا وفتحنا المدونة تاني
:D


عمك ياض)
What kind of names is that ?

ليه الناس اللي داخلة شمال دي ؟
تحب نقفله يا فندم ؟
:D
بس أصله طالما البلوج مدايق حضرتك كدة ... يبقى كدة المدونة أدت رسالتها السامية :D

ســـارة said...

لطفاً .. رايك يهمني في هذه التدوينة

http://kabasisapharmacist.blogspot.com/2008/08/blog-post.html