قلــــــــب إزاز

حتت إزاز متكسّرة
يمين شمال متنطورة
وكل حتة ليها قصة
فيها معنى وشايلة ذكرى

***

فتافيت ازاز متجرّحة
فيها كتب متفتحة
فيها صور متقطّعة
وعيون كتيرة مدمّعة

***

فيها ابتسامتي اللي اختفت
فيها ملامحي من الطفولة
والأماني اللي اتمحت

***

قلبي الإزاز كنت حاطاه بين ايديك
وقلتلك دة بيتكسر
خاف عليه وحطه في عينيك
كنت فاكر اني خايفة عالازاز
بس الحقيقة هي اني
كنت خايفة ان الازاز يجرح ايديك

***

لو كان بايدي كنت قلت لقلبي يجمد
بس القساوة اللي في ايديك
كانت عليه أجمد و أجمد
وأهو اتكسر
ومن قساوتك
حتت الازاز قلبت حجر